Qeveria e Kosovës ka aprovuar kërkesën e Komunës së Gjilanit për shfrytëzim të hapësirës së Spitalit të Gjilanit për të ndërtuar shkollën e mesme të mjekësisë dhe objektin për qëndrim ditor për të moshuarit.
Përmes një konference për medie, Ministri i Shëndetësisë, Arben Vitia, tha se miratimi i kësaj kërkese është i rëndësishëm, pasi kjo shkollë zhvillon mësimin në objektin e një shkolle tjetër, e për pasojë të dyja punojnë pa pjesën laboratorike e praktike.
“Meqenëse kjo hapësirë në shumë drejtime do të shërbejë edhe për shëndetin dhe mirëqenien e pensionistëve dhe për mjekët e ardhshëm, konsiderojmë se do të jetë në dobi të qytetarëve. Gjilani është një nga qytetet që ka një numër të konsiderueshme të studentëve në Fakultetin e Mjekësisë” – tha Vitia.
Pas mbledhjes së Qeverisë, Vitia foli edhe për investimet në shëndetësi, teksa premtoi se së shpejti do të ofrohen shërbime të reja në sektorin publik shëndetësor, konkretisht në klinikat e Gjinekologjisë, Neurokirurgjisë dhe Kirurgjisë Vaskulare.
“Në Gjinekologji shpejt pritet të aktivizohen tri shërbime të reja: frytnimi i asistuar mjekësor, amniocenteza dhe mjekësia fetale, për të cilat gratë janë detyruar t’i marrin në institucione private ose jashtë vendit”, shtoi tutje Vitia.
Këto investime, Vitia tha se po bëhen me intensitet të shtuar për të lehtësuar kushtet e punës dhe marrjen e shërbimeve nga pacientët./teve1.info/.
