Numri i të vdekurve në Kenia nga përmbytjet shkatërruese që përfshiu vendin është ngjitur në 228, ndërsa autoritetet po përgatiten për afrimin e ciklonit tropikal Hidaya, i cili kërcënon të përkeqësojë krizën.
Me reshjet e dendura të shiut dhe erërat e forta që priten të intensifikohen në ditët në vijim, qeveria të dielën u bëri thirrje qytetarëve që të tregojnë kujdes ekstrem dhe të përgatiten për përpjekjet e mundshme të evakuimit.
“Ne vajtojmë humbjen e 9 jetëve në 24 orët e fundit, duke përfshirë 7 të rritur dhe 2 fëmijë, duke e çuar numrin total të vdekjeve nga përmbytjet në 228, në të gjithë vendin. Qeveria përcjell ngushëllimet e saj të përzemërta për miqtë dhe familjet që kanë humbur të dashurit”, tha Isaac Mwaura, zëdhënësi i qeverisë së Kenias.
Ai shtoi: “Tragjikisht, përmbytjet e vazhdueshme kanë rezultuar në plagosjen e 164 kenianëve, ndërsa 72 persona janë raportuar aktualisht të zhdukur. Për më tepër, rreth 212,630 persona, nga 42,526 familje janë zhvendosur”, raporton Anadolu.
Qeveria vuri në dukje se për fat të keq, tragjedia shtrihet përtej përmbytjeve, me një rrëshqitje shkatërruese dheu në Mai Mahiu duke marrë jetën e 52 individëve, duke lënë dhjetëra të tjerë të plagosur dhe 51 persona të raportuar të zhdukur.
Operacionet e kërkim-shpëtimit/rikthimit vazhdojnë në zonat e prekura, me 151 personel të Forcave të Mbrojtjes të Kenias dhe 400 oficerë të Shërbimit Kombëtar të Rinisë të vendosur për të ndihmuar në përpjekjet e rimëkëmbjes.
Qarqet më të goditura, duke përfshirë Homa Bay, Kajiado, Nakuru, Mandera dhe Nairobi, përballen me përmbytje të mëdha, duke shkaktuar ndërprerje të konsiderueshme në jetën e përditshme dhe aktivitetet ekonomike.
Në përgjigje të rrezikut në rritje, qeveria thotë se vazhdon të zbatojë një njoftim evakuimi 24-orësh të lëshuar më 2 maj, duke i dhënë përparësi sigurisë së qytetarëve që banojnë pranë digave dhe rezervuarëve të ujit me rrezik të lartë.
Mes krizës në vazhdim, Kenia po përgatitet për ardhjen e afërt të ciklonit tropikal Hidaya, i cili pritet të sjellë reshje të mëdha shiu dhe erëra të forta në rajonet bregdetare të dielën në mbrëmje, duke përfshirë Kwale, Mombasa, Kilifi dhe Lamu.
Peshkatarët dhe përdoruesit e tjerë të oqeanit janë këshilluar të ushtrojnë kujdes ekstrem, pasi varkat e vogla dhe mjetet artizanale mund të bëhen të paqëndrueshme përballë erërave të freskëta deri të forta.
