Kryetari i Asociacionit të Gazetarëve të Kosovës (AGK), Xhemajl Rexha, ka thënë se raporti i “Reporterëve pa Kufij” nuk është vetëm shqetësues, por edhe alarmant.
Ai ka thënë se në këtë renditje kanë ndikuar sulmet politike që vinë nga ana e eksponentëve të Qeverisë ndaj gazetarëve dhe mediave.
“Ishte e pritshme për shkak të gjitha zhvillimeve të vitit të fundit që kjo Qeveri ka marrë për të përkeqësuar klimën e të bërit gazetari në Kosovë dhe funksionimin e lirë të mediave. Mbase rënie drastike për 19 vende ishte një shok dhe nuk ishte e pritshme për kaq rënie të madhe. Ky raport i ka renditur edhe arsyejet dhe kryesorja është sulmet politike që vinë nga ana e eksponentëve të Qeverisë ndaj gazetarëve dhe mediave. Nuk është vetëm shqetësuese është edhe alarmuese, është renditja më e keqe në dekadën e fundit”, ka deklaruar ai në emisionin “Info Nata” në Tëvë 1.
Kosova ka rënë për 19 vende në Indeksin vjetor për lirinë e shtypit të organizatës Reporterët pa Kufij, përkatësisht këtë vit renditet në vendin e 75 në botë nga 180 shtete, për dallim nga viti i kaluar që ishte në vendin e 56-të.
Në raportin e publikuar nga Reporterët pa Kufij më 3 maj, në Ditën Botërore të Lirisë së Shtypit, thuhet se mediat në Kosovë, pavarësisht se vazhdojnë t’i mbajnë përgjegjës politikanët, gazetarët vazhdojnë të jenë “cak i sulmeve politike”.