Anëtari i Bordit të Këshillit të Pavarur të Mediave, Fitim Veliu ka thënë se mungesa e lirisë së shprehjes në Kosovë ka të bëjë më shumë për pjesën veriore të vendit.
Veliu duke ju referuar sulmit të 24 shtatorit në Banjskë tha se gazetarët shumë shpesh kanë kërkuar ndihmë nga Policia dhe Prokuroria.
“Unë mendoj se sa i përket lirisë së shprehjes, kemi të bëjmë pak a shumë me segmentin e lirisë dhe mungesës së lirisë, cenueshmërisë në pjesën veriore të Kosovës, por jo në pjesët e tjera, për arsyeje se gjatë viti të kaluar ne kishim trazira në atë pjesë të vendit për shkak të rikthimit të kryetarëve. Megjithatë në atë pjesë gazetarët u cenuan, madje u dhunuan, keqtrajtuan nga bandat kriminale të asaj pjesë të veriut. Vitin e kaluar deri te sulmi i Banjskës mund të themi që Republika e Kosovës ka pasur shumë pak qasje në atë pjesë, sa që gazetaret kanë kërkuar ndihmë nga Policia e Kosovës, Prokuroria që të mbrohen, por ka qenë e vështirë për shkak se bandat kriminale kanë qenë shumë të instumentuar dhe të aktivizune në atë pjesë. Prandaj unë mendoj që mungesa e lirisë së shprehjes dhe cenimi i saj më shumë ka të bëjë me pjesën veriore të Kosovës, por jo edhe me pjesën tjetër të vendit”, ka deklaruar ai në emisionin “Ditari” në Tëvë 1.
Kosova ka rënë për 19 vende në Indeksin vjetor për lirinë e shtypit të organizatës Reporterët pa Kufij, përkatësisht këtë vit renditet në vendin e 75 në botë nga 180 shtete, për dallim nga viti i kaluar që ishte në vendin e 56-të.
Në raportin e publikuar nga Reporterët pa Kufij më 3 maj, në Ditën Botërore të Lirisë së Shtypit, thuhet se mediat në Kosovë, pavarësisht se vazhdojnë t’i mbajnë përgjegjës politikanët, gazetarët vazhdojnë të jenë “cak i sulmeve politike”.
