Me intonimin e himnit kombëtar, filloi ceremonia përkujtimore e 31 të masakruarve në Nabërgjan të Pejës.
Për t’i nderuar ata, erdhi edhe kryeministri Albin Kurti me disa deputetë të Lëvizjes Vetëvendosje.
Kryeministri i tha se të rënët në këtë masakër përpos dhimbjes janë edhe krenaria e gjithë popullit.
“Ata u vranë sepse ishin shqiptarë dhe donin të jetojnë të lirë në tokën e tyre ndërkaq kishin përballë një makineri ushtarake, policore e cila po marshonte me projektin gjenocidal të ideuar, të planifikuar në Beograd nga regjimi i Millosheviqit për shfarosjen e shqiptarëve”, tha Kurti.
Derisa nuk la pa akuzuar institucionet e drejtësisë për mosefikasitet në drejtim të zbardhjes së krimeve të luftës.
Për Kurtin, Prokuroria e Shtetit e ka dhe do ta ketë mbështetjen e Qeverisë.
“Jo vetëm që s’ka asnjë të dënuar as të gjykuar por nuk ka asnjë të akuzuar. Qeveria e RKS duke i ngritur kapacitetet edhe të hetimit edhe kushtet e të ardhurat e Prokurorëve ka krijuar të gjitha mundësitë që kriminelët qoftë në prezence, qoftë në mungesë të akuzohen, gjykohen, dënohen”, tha Kurti.
Pas fjalimeve, Kurti bashkë me familjarët e të masakruarve bëri homazhe tek varret e tyre.
Aty kryeministri u njoftua për të gjithë të rënët që ishin vrarë nga 1 deri më 18 maj të vitit 1999.
