Rreth 300 kompani janë në pritje të marrjes së licencës në Komisionin e Pavarur për Miniera dhe Minerale.
Por, mungesa e bordit tash e 9 muaj të KPMM-së, i ka lënë këto biznese ende në pritje dhe pa operuar.
Kryetari i Komisionit për Ekonomi, Ferat Shala thotë se zvarritja e këtij procesi është duke u bërë kundërligjshëm nga pushteti aktual.
Deputeti opozitar akuzon Lëvizjen Vetëvendosje se e gjithë kjo po bëhet me qëllim të emërimit të njerëzve të tyre në këtë bord.
“Është shpallur konkursi janë shkelë rregullat e konkursit ka vazhduar procedura në Qeveri, Qeveria përsëri ka ndërhyrë dhe e ka ulur numrin e atyre që kanë ofertuar gjegjësisht aplikuar dhe në Komision kanë ardhur 6 kandidatë që do duhej të zgjedheshin 3, edhe pse konkursi e thotë që do duhej të jenë 5. Tani situata është e tillë ku shkeljet janë jashtëzakonisht të mëdha juridikisht dhe Qeveria si duket ka parë gabimet dhe ndërhyrjet e tyre juridike është në orvatje se çfarë vendimesh duhet të merr. Të gjitha këto kanë pasoja për tërë industrinë përpunuese nxjerrëse minerale, me theks të veçantë te ndërmarrjet e sektorit privat, ka thënë Shala për Tëvë 1.
Derisa nga partia në pushtet për Tëvë 1 tregojnë se në seancën e javës së ardhshme pritet që të sillet për votim në Kuvend ky propozim.
“Vonesat e kompletimit të Bordit normalisht që ndikojnë në punën e KPMM-së dhe ne jemi të fokusuar maksimalisht që një gjë e tillë të ndodhë sa më shpejt që është e mundur pra të ndodhë kompletimi i Bordit dhe të vazhdohet me punën normalisht dhe fushëveprimtaria e Bordit të jetë të themi në ato nivelet që dëshirojmë për arsye se ka nevojë sektori”, ka thënë Driton Hyseni, deputet i Lëvizjes Vetëvendosje.
E kryetari i Lidhjes së Bizneseve të Kosovës, Besart Dreshaj thotë se vonesat e tilla janë duke iu shkaktuar shumë dëme financiare kompanive të kësaj fushe.
“Çdo ditë e humbur është çdo ditë mijëra euro për kompanitë të cilat sot si rezultat i mungesës së tyre nuk mund të funksionojnë dhe ushtrojnë detyrën, kur dihet që makineria e tyre është jashtëzakonisht e rëndë dhe e kushtueshme dhe të gjitha kompanitë pothuajse janë pjesë e kredive të cilat obligohen t’i paguajnë kamatat e kredive që nuk janë të favorshme për bzineset në Kosovë e pothuasje sot ato nuk funksionojnë fare ndërsa kredia vetëm i vazhdon dhe kamatat janë të obliguar t’i paguajnë”, ka thënë Dreshaj.
Kuvendi i Kosovës kishte shkarkuar Bordin e KPMM-së në shtator të vitit të kaluar me kërkesë të Lëvizjes Vetëvendosje, për shkak të një vendimi për faljen e një borxhi ndaj Ferronikelit.
