Kryeministri i Kosovës, Albin Kurti, tha se rezultatet e votimit të sotëm në katër komunat veriore, tregojnë që nuk ka vullnet për shkarkimin kryetarëve aktual, raporton teve1.info
Përmes një statusi në Facebook, Kurti tha se mundësimi i shkarkimit të kryetarëve aktual dhe mbajtja e zgjedhjeve për shkarkim, ishin kriter kyç për largimin e masave ndaj Kosovës nga ana e Bashkimit Evropian.
“Këto masa të padrejta, pas votimit të sotëm, duhet larguar sa më parë”, shkroi Kurti.
Kurti tha se një vit pas zgjedhjeve të jashtëzakonshme lokale në komunat me shumicë serbe – Mitrovicë e Veriut, Zubin Potok, Zveçan dhe Leposaviq, të cilat u mbajtën më 23 prill të vitit 2023, e u njohën nga BE dhe ShBA, përkatësisht QUINT-i, sot u mbajtën ‘zgjedhjet për shkarkim’ të këtyre kryetarëve.
“Rezultatet e votimit të sotëm tregojnë që nuk ka vullnet për t’i shkarkuar kryetarët aktual. 20% të votave të mbledhura nga Lista Serbe për peticionin për të inicuar këtë proces, nuk rezultuan më shumë se aq. Serbia e ka parë që mund t’i mbledh 20% por jo edhe 50%”, tha ndër të tjera Kurti.
Ai kërkoi nga Bashkimi Evropian heqjen e masave për Kosovën.
“Mundësimi i shkarkimit të kryetarëve aktual dhe mbajtja e zgjedhjeve për shkarkim ishin kriter kyç për largimin e masave ndaj Kosovës nga ana e Bashkimit Evropian. Këto masa të padrejta, pas votimit të sotëm, duhet larguar sa më parë”, shkroi Kurti në Facebook.
