Me pajisje të rënda ushtarake, filluan edhe gjuajtjet.
Kështu të premten ushtria serbe filloi stërvitje ushtarake “Vihor 2024” në Peshter të Sanxhakut, i cili gjendet 30 kilometra larg kufirit të Kosovës.
Në këto stërvitje që zgjasin deri më 21 prill, do të përdoren artileri të rënda ushtarake, dronë kamikaz e gjuajtje nga snajperistët dhe tanket serbe.
Por për këto ushtrime të ushtrisë serbe, kryeministri Albin Kurti po akuzon presidentin serb, Aleksandar Vuçiq si destabilizues të Ballkanit Perëndimor.
“Kjo është edhe një dëshmi se Serbia është autoriteti, instanca e faktori kryesor i përpjekjeve destabilizuese për rajonin e Ballkanit Perëndimor dhe paraqet kërcënim për republikën tonë të cilën ata nuk e njohin. Meqenëse jemi këtu me Ministrin e Mjedisit, Planifikimit Hapësinor dhe Insfrastrukturës, mund të themi se këto ushtrime paraqesin edhe ndotjen më të madhe të ajrit e të tokës në Sanxhak”, tha kryeministri Kurti.
E njohësit e sigurisë në vend, përveç se i shohin si kërcënim direkt për Republikën këto veprime të Vuçiqit, thonë se janë për konsum të brendshëm.
Sipas ish-gjeneralit Kadri Kastrati, presidenti serb po dëshiron ta tregojë forcën ushtarake.
“Ka të bëjë me një kërcënim direkt për Republikën e Kosovës apo të tregojë fuqinë e vetë, forcën se Serbia ka një ushtri e cila faktikisht është më e fuqishmja këtu në rajon. Dhe po dalin ato kërcënimet e presidentit Vuçiq, i cili ka kërcënuar direkt Kosovën por edhe rajonin që Serbia do të vepron sipas planeve të tyre për të ngritur tensione dhe për konsum të brendshëm politik”, thha ish-gjenerali.
Për t’i përcjellur këto ushtrime të ushtrisë serbe, u ftua edhe komandanti i KFOR-it në Kosovë, Ozkan Ulutas.
E ish koloneli i Forcës së Sigurisë, Afrim Veseli, thotë se pjesëmarrja e tij në këtë ushtrim, është në të mirën e Kosovës.
“Ushtrimi që është duke u mbajtur në fushën e Peshterit, kanë thirr edhe komandantin e KFOR-it, për t’i ikur kritikave të bashkësisë ndërkombëtare ka ndodhur kjo ftesë, mirëpo gjenerali turk, gjenerali i KFOR-it me shumë profesionalizëm ka pranuar ftesën dhe ka shkuar, sepse unë e di që çdo ushtarë i Republikës së Turqisë është i gatshëm të luftoj dhe të vdes për Kosovën”, tha Veseli.
Pas përfundimit të gjuajtjeve në poligone të ndryshme, Vuçiq tha se nga ky ushtrim, ushtria e tij do të forcohet edhe më shumë.
