Kandidati shqiptar për president të Maqedonisë Veriore, Arben Taravari, ka publikuar programin e tij për politikën e Jashtme që do ta ndjek ky shtet nëse ai fiton garën.
Taravari ka bërë të ditur se do t’i propozojë Kuvendit që Maqedonia Veriore të dal nga procesi i Ballkanit të Hapur.
“Maqedonia e Veriut e integruar në rajon dhe Evropë. Do t’i propozoj Kuvendit daljen e menjëhershme të Maqedonisë së Veriut nga nisma Ballkani i Hapur. Harmonizim të plotë të politikës sonë të jashtme me atë të BE-së, veçanërisht në lidhje me sanksionet e BE-së kundër Rusisë”, ka shkruar ai, përcjell teve1.info
Procesi i Ballkanit ishte refuzuar nga Kosova dhe Mali i Zi.
Nisma, që fillimisht u quajt Mini-Shengen, nisi më 10 tetor 2019, në Novi Sad të Serbisë, dhe u firmos nga presidenti i Serbisë, Aleksandar Vuçiq, kryeministri i Shqipërisë, Edi Rama, dhe kryeministri i atëhershëm i Maqedonisë së Veriut, Zoran Zaev.
Por në korrik të vitit të kaluar, kryeministri i Shqipërisë, Edi Rama e kishte quajtur të mbyllur këtë proces, ndonëse më vonë kishte thënë se deklarata e tij është keqkuptuar. Por që nga viti i kalaur nuk është mbajtur asnjë takim në kuadër të shteteve pjesëmarrëse në Ballkanin e Hapur.
Shqipëria, Maqedonia Veriore dhe Serbia kishin nënshkruar disa marrëveshje në kuadër të këtij bashkëpunimi.
