Teksti nga gazetarja: Gresa Bardhecaj
Rreth tre muaj pas vrasjes së Lulzim Fejzullahut nga Podujeva, të enjten u mbajt seancë gjyqësore në Gjykatën Themelore në Prishtinë.
Seanca filloi në orën 9, por ishte e mbyllur për publikun.
Derisa në oborrin e Pallatit të Drejtësisë ishin të pranishëm familjarë të të ndjerit.
Gati 2 orë më vonë, dolën dy avokatët e të dyja palëve.
Por për atë qe ndodhi në seancë, nuk u dhanë fare detaje.
Avokati i familjes Fejzullahu, Tomë Gashi tha se është dëgjuar vetëm një dëshmitar.
“Nuk është e ndaluar me iu tregu që kanë qenë dy dëshmitar, njëri prej tyre është marrë në pyetje kurse tjetri në mungesë të asaj nëe ka pranuar ftesë të rregullt apo jo është mbetë për seancën e radhës.”
Derisa Rrahim, Fejzullahu -axha i të ndjerit tha se beson në drejtësi.
“Unë i besoj drejtësisë dhe vetëm drejtësisë”, ka deklaruar ai.
Edhe avokati i njërit të akuzuar, Skender Musa ishte i shkurtër në prononcimin e tij.
“Çka ka ndodhë sot në seancë është e ndalume, është marrë edhe aktvendim se çka ka ndodhë në seancë, gjendja është përcjellë nga ana e psikologut të caktuar nga gjykata ndaj dy të miturve, diçka tjetër nuk ka”, tha ai.
Më 14 janar të këtij viti, 18 vjeçari Lulzim Fejzullahu dyshohet se u godit me veturë e më pas u rrah brutalisht nga dy të mitur, ku si pasojë e lëndimeve të marra vdiq në QKUK gjashtë ditë pas.
Prokuroria Themelore në Prishtinë më 25 mars ka paraqitur propozim për shqiptimin e dënimit me burgim për të miturit për shkak të veprës penale “Vrasja e rëndë”./Tëvë1
