E në Tabje të Pejës para disa ditësh, gërmimet e thella në rrugë nxorën në pah kafka e eshtra njerëzish.
Kështu të paktën mendojnë nga partia e Ballit Kombëtar. Sekretari i kësaj partie në degën e Pejës, Afrim Shabi i ka thënë televizionit se posedon materiale që e dëshmojnë këtë.
Por thotë se institucionet kanë dashur ta fshehin këtë.
Megjithatë këtë e mohojnë nga komuna e Pejës.
Nënkryetari Fatmir Asllani thotë se mbipopullimi i qytetit e ka bërë më të vështirë identifikimin e vendeve të varrezave.
“Kompania e cila bën varrimin për Bashkësinë Islame është kujdes për pjesën e ceremonisë për rivarrimin e këtyre eshtrave edhe pse ne nuk kemi shënime zyrtare të numrit për me identifiku sa persona ose sa eshtra kanë dalë në këtë sipërfaqe. Sigurisht që është një listë e atyre të ekzekutuarve, edhe pse ne nuk kemi shënime zyrtare por ekziston sipas historisë zyrtare, një listë e zyrtarëve që jan ekzekutu në atë vend. Por për rastin e fundit jo”, tha Asllani.
Detaje të këtij rasti kanë dhënë edhe nga Policia e Kosovës.
“Policia është njoftu më datën 3 prill. Ka dalë në vend të ngjarjes, më datën 4 policia, inspektorë sanitarë, pjesëtarë të Bashkësisë Islame i kanë mbledh eshtrat dhe i kanë rivarros në varreza të qytetit. Kurrfarë identifikimi nuk është bë”, tha Fadil Gashi, zëdhënës i Policisë.
Dyshohet se në këtë zonë në tërësi janë eshtrat e mbi tre mijë personave të vrarë gjatë Luftës së Dytë Botërore.
Kronika e realizuar nga gazetari Gojart Jashari.
