100 noter pritet ti shtohen së shpejti të gjitha komunave të Kosovës. Ministria e Drejtësisë ka thënë se është çështje javësh emërimi i noterëve të rinj, derisa kanë potencuar faktin se do të hapen zyre të noterëve edhe në veri të vendit.
Të gjitha komunat që s’kanë noter, së shpejti, nuk do ta kenë më një problem të tillë.
Kjo pasi Ministria e Drejtësisë ka hapur konkurs për zgjedhjen e 100 noterëve në tërë territorin e Kosovës.
Një ndër komunat e shumta që kanë pasur këtë problem ka qenë edhe ajo e Obiliqit.
Linda Bekteshi, drejtoreshë e Administratës Publike, ka thënë se banorët për të kryer këto shërbime u është dashur të shkojnë në Prishtinë.
“neve na takojnë ti kemi dy noter në komunën e Obiliqit, dhe kemi kërkesa të vazhdueshme nga ana e qytetarëve që ta kenë një noter në komunën tonë por kjo nuk varet nga ne pasi duhet të shkojë në procedura të MD-së.”, tha Drejtoresha e Administratës Publike, Linda Bekteshi.
Nga Ministria e Drejtësisë përmes një përgjigje me shkrim, kanë thënë se është çështje javësh emërimi i noterëve të rinj.
“Intervistimi i kandidatëve do të bëhet nga Komisioni për Zgjedhjen e Noterëve menjëherë pas përmbylljes së afatit për aplikim në konkursin për zgjedhjen e noterëve. Ky komision bazuar në ligjin në fuqi i rekomandon Ministres së Drejtësisë listën e kandidatëve që i plotësojnë kushtet për t’u emëruar noter. Në këtë kuptim, zgjedhja përkatësisht emërimi i noterëve të rinj tashmë është çështje javësh.”, është thënë nga Ministria e Drejtësisë.
Tutje nga ky dikaster kanë bërë të ditur se do të hapën zyre edhe në komunat veriore.
“Bazuar në numrin e pozitave të lira të shpallura me konkurs, si dhe përcaktimin ligjor për numrin e noterëve përkitazi me numrin e banorëve në komuna, vendit, që tani ka 50 noterë në tërë territorin e Republikës së Kosovës, do t’i shtohen edhe 100 noter të rinj. Ky është lajm jashtëzakonisht i mirë për sistemin noterial në vendin tonë, marrë parasysh se aktualisht kemi 18 komuna pa asnjë noter, por edhe për faktin se për herë të parë sistemi noterial do të shtrihet në tërë territorin e Republikës së Kosovës përmes hapjes së zyrave në të gjitha komunat, përfshirë edhe komunat në veri të vendit.”, është bërë e ditur nga Ministria e Drejtësisë.
Javë më parë Ministrja e Drejtësisë kishte certifikuar 59 noterët e rinj.
Autore: Gresa Bardhecaj
