Kryetari i kuvendit, Glauk Konjufca, tha se Beteja e Koshares shquhet për përfshirjen më të madhe ushtarake, mobilizimin dhe gjithpërfshirjen më të madhe kombëtare shqiptare si dhe zhvillimin e betejës krah për krah me NATO-n, raporton teve1.info
Në seancën solemne të Kuvendit të Kosovës kushtuar 25-vjetorit të Betejës së Koshares ku u vranë 111 ushtarë të UÇK-së dhe u plagosën qindra të tjerë, Konjufca tha se themelimi i UÇK-së është një nga ngjarjet më të rëndësishme të kombit shqiptar në 100 vitet fundit ndërsa beteja e Koshares është një nga betejat më të lavdishme të luftës tonë për çlirim nga Serbia.
“Ashtu siç UÇK ia dha çlirimin dhe lirinë Kosovës, Beteja e Koshares ia dha namin UÇK-së si një ushtri e aftë për ta sfiduar fuqishëm armatën serbo-jugosllave, për ta bërë atë të paaftë për me garantu kufirin e vendosur dhunshëm mes Kosovës e Shqipërisë. Prandaj jemi mbledhur sot për ta kujtuar këtë betejë historike të UÇK-së e për të nderuar të gjithë dëshmorët e rënë të saj me në krye heroin e Kosovës Agim Ramadanin, komandantin emblematik të Brigadës 138”, tha Konjufca.
Ai shtoi se beteja u bë shtegu pa kthim i përpjekjeve gati njëshekullore të shqiptarëve për çlirim e bashkim.
“Kjo betejë ishte sinonimi më i mirë i ushtarit të Kosovës, shembja e gurit të kufirit me çizmet e komandantit Agim Ramadani e Sali Qekajt ishte njëra nga ngjarjet më historike të luftës së UÇK-së”, tha Konjufca.
Kryeparlamentari tha se në kontekstin e luftës, Beteja e Koshares do të vlerësohet së paku për tri aspekte:
“Imperacionin më të madh luftarak të UÇK-së, përveç se po ashtu edhe beteja më e përgjakshme me 111 dëshmorë, qindra të plagosur e mijëra luftëtarë të cilët ishin në front drejtpërdrejtë kundër ushtrisë së Jugosllavisë. Kjo betejë ia ndërroi fizionominë UÇK-së si një ushtri që ishte e gatshme të ndërmerrte operacione luftarake në shkallë të gjerë kundër Jugosllavisë së Serbisë. Pra Beteja Koshares do të vlerësohet për cilësitë e saj të larta, e realizuar si një operacion ushtarak i paparë deri atëherë. E dyta, kjo shënon një përbashkim të lartë kombëtar, me gjithpërfshirje të të gjitha trevave të ushtarëve që merrnin pjesë nga të gjitha viset e vendit tonë duke përfshirë edhe mërgatën tonë. E treta e bënë këtë betejë një nga betejat më domethënëse për mobilizimin gjithëkombëtar sepse për çlirimin e Kosovës në Koshare luftoi e gjithë shqiptaria. E treta, është një nga betejat me historike edhe për faktin që ajo u zhvillua si operacion krah për krah me aleancën më të fuqishme demokratike të botës, të NATO-s për ndalimin e spastrimit etnik të Serbisë dhe gjenocidit të Serbisë ndaj popullit shqiptar”, tha Konjufca.
