Kryeministri i Kosovës, Albin Kurti në seancën e sotme të Kuvendit të Kosovës kushtuar 25-vjetorit të Betejës së Koshares, ka thënë se panorama e madhe e historisë së Betejës së Koshares, përcjell imazhin e tërë luftës së Kosovës.
Kurti në fjalimin e tij në Kuvend, tha se ka shumë data dhe ngjarje me peshë historike, te të cilat do të ndalet për t`i nderuar dhe respektuar dëshmorët e kësaj beteje.
“Beteja e Koshares zgjati mes luftimesh nga 9 prilli e deri me 10 qershor të vitit 1999, panorama e madhe e historisë së Betejës së Koshares përcjell imazhin e pothuajse tërë luftës së Kosovës si në një format miniaturë, aty e shohim së në luftimet e Betejës së Koshares janë të përfshirë luftëtarë dhe njësite nga të gjitha zonat operative të UÇK-së, si dhe nga të gjitha trevat e banuara me shqiptarë. Kjo është një arsye thelbësore se një histori e 25 viteve na ka mbledhur sot këtu në sallën plenarë të Kuvendit të Kosovës, në këtë seancë solemne për 25-vjetorin e Betejës së Koshares në mes të këtij viti do të përmbushet një çerek shekulli prej ku vendi ynë Kosova dhe populli i saj u çlirua nga Serbia pushtuese dhe regjimi kriminal e terrorist e deri në mesin e muajit qershor kur ta shënojmë 25 vjetorin e çlirimit të Kosovës, ka shumë data dhe ngjarje me peshë historike te të cilat do të ndalemi për t`i nderuar dhe përkujtuar”, tha Kurti.
Tutje, Kurti u shpreh se nuk mund të ketë shtet-ndërtim model dhe as shtet-ndërtim demokratik, siç tha ai , pa i njohur dhe respektuar traditat shoqërore dhe historinë e popullit të Kosovës.
“Respektimi i traditave shoqërore dhe historisë së popullit janë dy parime dhe praktika qenësore në kulturën e shtet-ndërtimit model, nuk mund të ketë progres shoqëror dhe vizion politik në njërën anë dhe as shtet-ndërtim demokratik në anën tjetër pa i njohur respektuar dhe institucionalizuar, traditat shoqërore dhe historinë e popullit që e kemi bërë e përbën dhe e mban shteti”, u shpreh kryeministri Kurti./teve1.info/