Në Katedralen “Shën Nënë Tereza” u mblodhën mëngjesin e së dielës qytetarët e besimit katolik për të shënuar pashkët.
Imzot Dodë Gjergji duke iu uruar të gjithë besimtarëve katolikë Pashkët, u lut që princi i paqes të shërojë zemrat e të gjithë njerëzve, që të munden të dëbojnë urrejtjen prej zemrës së tyre, të mos ketë më luftëra dhe vdekje të panevojshme, por të jetojnë në paqe dhe harmoni.
“Është në të vërtetë një moment i bukur, që të bashkë ndajmë harenë dhe gëzimin dhe vullnetin tonë për paqe dhe për dashuri, me të gjithë njerëzit që jetojnë në këtë vend duke i ftuar të gjithë që të ndërtojmë së bashku harmoninë dhe paqen, dhe të lutemi për paqe në botë, për të gjithë ata njerëz që sot janë duke vuajtur nga lufta, siç kemi vuajtur edhe ne dikur. Dashtë Zoti që princi i paqes të shërojë zemrat e të gjithë njerëzve, dhe ata të mund të dëbojnë urrejtjen prej zemrës së tyre dhe të përqafojnë Krishtin, bile porosinë e tij për paqe, që të mos ketë më luftëra dhe vdekje të panevojshme, por njerëzit të mund të jetojnë në paqe dhe harmoni”, tha ai.
Në këtë ceremoni mori pjesë Kryetari i Komunës së Prishtinës, Përparim Rama, i cili u ka uruar të gjithë besimtarëve të krishterë Pashkët, duke shpresuar për një jetë të gjatë dhe të lumtur, me harmoni të plotë.
“Morëm pjesë në këtë ditë ceremoniale, ditë të madhe të besimit të krishterë, e cila na tregon për reflektim për rijetësim, paqe, harmoni dhe lumturi ndaj njerëzve. Uroj të gjithëve besimtarëve të krishterë, urime Pashkët, paqit një jetë të gjatë të lumtur me harmoni të mrekullueshme, jo vetëm për të krishterët por për të gjithë botën”, u shpreh Rama.
Qytetarët e këtij besimi për festën e Pashkëve i uruan krerët e shtetit, ata të opozitës dhe ambasadorë të akredituar në Kosovë.
Pashkët janë kremtimi më i madh i kalendarit liturgjik të besimit katolik që kremtojnë ringjalljen e Krishtit.