Nga vëzhgues, në anëtar të asocuar në Asamblenë Parlamentare të NATO-s.
Ky është avancimi i statusit të Kosovës në këtë Asamble që u bë i ditur javën e kaluar.
Deri në anëtarësimin e plotë të Kosovës në NATO, ky është niveli më i lartë i prezencës në Asamble.
Këtë lajm e ka mirëpritur kryesuesi i delegacionit Kosovar, Driton Hyseni, i cili tregoi se cilët faktorë ndikuan në këtë avancim.
“Mendoj që edhe pozicionimi i Kosovës krah për krah me vendet anëtare të NATO-s në sanksionimin e Rusisë për shkak të konfliktit dhe agresionit të tmerrshëm ndaj Ukrainës, ka bërë të krijojë një momentum tjetër dhe që të gjitha vendet e NATOs ta kenë të qartë se Republika e Kosovës shtyn përpara vetëm ato vlera që përqafohen nga NATO, promovohen nga NATO dhe ne do të operojmë krahas këtyre vlerave”, ka deklaruar ai.
Derisa shprehet optimist se edhe vendet mosnjohëse brenda Aleancës veriatlantike, do ta përkrahin rrugëtimin e Kosovës.
“Unë mendoj se ne do të vijë momenti kur do të hasim mirëkuptimin nga shtetet mosnjohëse, pse jo edhe njohjen nga ana e tyre. Por patjetër me ndihmën e aleatëve tanë SHBA, Mbretërisë së Bashkuar por edhe vendeve të BE-së të cilat edhe në datën 24 dhanë kontributin e veçantë për avancimin e statusit të delegacionit tonë në kuadër të Asamblesë Parlamentare, ne si vend të kemi mundësi që të kemi një dakordim edhe të shteteve mosnjohëse se sa i takon nevojës për të qenë NATO-ja më e fortë.”
Kurse, koloneli në pension i Forcës së Sigurisë së Kosovës, Hysen Gecaj thotë se ky është një hap i vogël por i rëndësishëm drejt NATO-s.
“Nato-ja në situata të ndryshme gjithmonë ka vepruar në këtë mënyrë edhe me shtete të ndryshme. Kemi rastin e Greqisë dhe Turqisë, kur me një procedurë të shpejtë janë pranuar në NATO. Dmth vet situatat që krijohen të sigurisë në Evropë i imponojnë disa veprime dhe përshpejtime të anëtarësimit të shteteve që nuk janë pjesë e NATO-s”.
Ky vendim do të formalizohet me votim në Asamblenë parlamentare të NATO-s në sesionin pranveror të Asamblesë, që do të mbahet më 27 maj në Sofje.
