Erik Ten Hag është një hap larg zyrtarizimit të marrëveshjes me Manchester United, teksa holandezi është përzgjedhur nga drejtuesit e Djajve të Kuq si njeriu i duhur për të rikthyer lavdinë në klubin anglez.
Por, teksa pret fundin e sezonit me Ajax, Ten Hag ka dorëzuar te drejtuesit e anglezëve edhe një listë me emrat që kërkon të nënshkruajë merkaton e ardhshme për të synuar ringritjen e United. 52-vjeçari preferon të ketë mbi të gjitha dy sulmues në repartin e avancuar duke qenë se aty pritet të ketë ndryshime me Rashford, Lingard, Cavani apo edhe Ronaldo të cilët janë me “valixhe në duar”.
Preferenca e parë për Ten Hag është bashkëkombasi i tij, Steven Bergwijn, i cili aktualisht është pjesë e Tottenham. Sulmuesi nuk është një zgjedhje e parë për trajnerin Antonio Conte me këtë të fundit që e ka aktivizuar në vetëm një rast si titullar, ndërsa preferon Dejan Kulusevskin.
Në këtë formë, Manchester United mund të përfitojë dhe ta transferojë për shumën e 20 milionë paundëve, ndërsa problem mbetet konkurrenca nga klubet gjermane dhe franceze të cilat po ashtu dëshirojnë 24-vjeçarin. Ndërkaq, një tjetër lojtar që është në listën e Ten Hag për Manchester United sezonin e ardhshëm është edhe Paulo Dybala.
Argjentinasi pasi vendosi të mos rinovojë me Juventusin, mund të largohet me parametër zero nga klubi italian dhe është një mundësi e mirë për Djajtë e Kuq. Sipas Corriere Dello Sport ka pasur një takim mes përfaqësuesve të sulmuesit dhe drejtuesve të United, ndërsa bisedimet janë të avancuara dhe premtuese.
