Kryeministri i Kosovës, Albin Kurti, i ka kujtuar demonstratat e 27 dhe 28 marsit të vitit 1989, ku policia serbe kishte vrarë 25 dhe plagosur mbi 600 demonstrues shqiptarë, raporton teve1.info
Përmes një statusi në Facebook, Kurti të rënët në këtë demonstratë i quajti ndër të rënët në rrugën e gjatë për liri të Kosovës.
“Më 27 dhe 28 mars të vitit 1989, policia e Serbisë i shtypi demonstratat paqësore të shqiptarëve gjithandej Kosovës, ku vetëm gjatë atyre dy ditëve u vranë 25 demonstrues dhe u plagosën 603 të tjerë. Ata po kërkonin të drejtat e tyre politike, duke e kundërshtuar shtypjen politike dhe instalimin e regjimit diskriminues dhe kriminal të Serbisë, që vetëm katër ditë më parë ia kishte suprimuar autonominë Kosovës. Në ditët që i pasuan këto demonstrata, 1200 demonstrues shqiptarë u burgosën pas gjyqesh politike. Lavdi të rënëve në demonstratat e vitit 1989 mes të rënëve në rrugën e gjatë të popullit të Kosovës për liri!”, ka shkruar Kurti.
