Për tri ditë radhazi dëshmoi në gjyqin ndaj ish krerëve të Ushtrisë Çlirimtare të Kosovës në Hagë.
Ish-diplomati amerikan, Shaun Byrnes të mërkurën, ka thënë se nuk kanë pasur prova që tregonin se Shtabi i Përgjithshëm i UÇK-së kishte dhënë urdhër për rrëmbim apo ndalime.
“Me lejoni që të jem tejet i saktë dhe i qartë; Ne as edhe njëherë nuk kemi patur ndonjë provë që të tregonte që Shtabi i Përgjithshëm i UÇK-së, Thaçi, Krasniqi, Ramë Buja, Xhaviti e të tjerë të kenë dhënë urdhër apo të udhëzonin që të merreshin peng, të rrëmbeheshin gazetarët serb apo aktivistë e LDK-së. Kurrë nuk kemi pasur prova të tilla, apo për ndonjë civil”, ka thënë ai.
Dëshmitari i 53-të tha se është e drejtë të thuhet që UÇK-ja në fakt s’arriti që ta këtë asnjëherë një strukturë të unifikuar të ushtrisë.
“Ne besonim dhe përpiqeshim që nga këta persona të pabindur, nga kjo milici të krijonim një ushtri koherente, tamam një ushtri që ishte në gjendje të kontrollohej por edhe të përfaqësohej prej tyre përpara komunitetit ndërkombëtare. Por, do të shtoj diçka që në fakt është analiza ime që mund ta kem pasuruar me informacione që i kam marrë pas luftës nga persona që dinin më shumë seç dija unë, persona të zonës që dinin më shumë seç dija unë. Po i referohem si zona të milicisë unë këtyre. Kishin marrëdhënie të ndryshme me shtabin e UCK-së qëndrorin”
Avokati i Kadri Veselit, Ben Emmerson pyeti dëshmitarin nëse kishte mosmarrëveshje në ndarjen e zonave që kontrolloheshin prej palëve.
“Nëse jo mosmarrëveshje, kishte të paktën paqartësi do të thoja sa i takon shtrirjes apo sipërfaqes që mbulonte zona e Pashtrikut ose mbivendosjes së zonës së Pashtrikut dhe zonës së Drenicës, në veçanti, zonën e Malishevës dhe Rahovecit. Pra, nuk ishte e qartë se cfarë territori përfshinte secila prej zonave dhe kishte disa paqartësi.
Gjatë kësaj kohe, Byrnes tha se nuk ishte takuar asnjëherë me Veselin, por që ishin përhapur fjalët që merrej me veprimtari të inteligjencës.
Kronika e realizuar nga Gresa Bardhecaj
