Kryeministri i vendit, Albin Kurti, në 25 vjetorin e rrëmbimit të katër djemve të Ferdonije Qerkizit nga forcat policore të Serbisë, ka thënë se shtëpia e kësaj familjes dëshmon gjenocidin dhe spastrimin etnik në Kosovë.
Kurti ka shkruar se ata do të kujtohen çdoherë.
“Në rrugën “Martirët Qerkezi”, në shtëpinë-muze qëndron Nëna Ferdonije. Brenda shtëpisë së zbrazët, ajo jeton mes kujtimeve dhe dëshmon forcën e Nënës. Shtëpia e familjes Qerkezi dëshmon gjenocidin dhe spastrimin etnik të Serbisë në Kosovë. Nga aty, 25 vite më parë, forcat policore të Serbisë ia rrëmbyen dhe zhdukën të katër djemtë: Artanin, Armendin, Ardianin e Edmondin, si dhe bashkëshortin Halimin. Nga ajo shtëpi u rrëmbyen edhe Vegim Qerkezi, Shpejtim Ymeraga, Skender e Myrteza Dylhasi, dhe Shpend e Fatos Jetishi”, ka shkruar në Facebook ai.
Po ashtu, Kurti tha se sakrifica e popullit tonë është themeli i Republikës sonë të lirë. /teve1.info/
