Kandidati i propozuar për kryeministër nga radhët e Partisë Demokratike të Kosovës, Bedri Hamza, e ka quajtur nder dhe përgjegjësi kandidimin e tij për këtë pozitë, raporton teve1.info
Në një konferencë të përbashkët për medie me kryetarin e PDK-së, Memli Krasniqi, Hamza tha se e ka mbështetjen e plotë të kryetarit Krasniqi dhe gjithë strukturave udhëheqëse në parti.
Hamza premtoi vendime të mëdha në pozitën e kryeministrit të ardhshëm.
“Kosova është një vend me potencial të madh por ka nevojë dhe mundësi për një rritje më të përshpejtuar ekonomike. Si një njeri me përvojë të gjatë institucionale, me funksione të ndryshme publike dhe duke njohur Kosovën e para luftës dhe pas luftës, sektorin privat dhe publik, komunën, ministrinë, BQK-në dhe Kuvendin e Kosovës, kam një pasqyrë të qartë të së kaluarës, tashmes dhe vizion për të ardhmen. Jam i vendosur të kontribuoj në avancimin dhe zhvillimin e Kosovës në të gjitha fushat”, tha ndër të tjera Hamza.
Ai shtoi se do të bëjë reforma në arsim, shërbim civil, zjarrfikës e ushtarët e FSK-së duke i shpërblyer me pagë të dinjitetshme.
“Kur them diçka e realizoj, e kalkuloj mirë, e kalkuloj saktë. Ndonjëherë duket e madhe por ajo ndodh. Ka ndodh në të kaluarën dhe do të ndodh prapë”, tha Hamza.
