Kryetari i Aleancës për Ardhmërinë e Kosovës (AAK), Ramush Haradinaj, ka kujtuar masakrat në Krushë të Madhe dhe në Krushë të Vogël, duke thënë se armiku kishte intensifikuar krimet dhe dëbimin e shqiptarëve.
Haradinaj tha se aty nuk u kursyen as pleqtë, gratë dhe fëmijët.
“Pas fillimit të fushatës së bombardimeve të NATO-s, forcat policore dhe ushtarake serbe duke parë fundin që po i vinte, kishin intensifikuar edhe më shumë krimet dhe dëbimin e popullatës shqiptare nga Kosova, duke mos kursyer as pleqtë, gratë dhe fëmijët”, ka thënë Haradinaj.
Sipas Haradinajt, të qenit në rresht me aleatët e sigurisë, garanton se krime të tilla të mos ndodhin më.
“Nuk do të ndalemi së kërkuari të dashurit tanë të pagjetur, varret e të cilëve janë ende të zbrazët. Nuk do ta ndalim kurrë betejën tonë, që fajtorët për këto krime, t’i përgjigjen drejtësisë. Gjithashtu, nuk do të ndalim angazhimin tonë për të qenë në rresht me aleatët tonë të sigurisë, të udhëhequr nga Amerika, garancë kjo se krime të tilla nuk do t’i ndodhin kurrë më popullit tonë”, ka përfunduar Haradinaj. /teve1.info/
