Është dhënë fjala përfundimtare në rastin ku 5 zyrtarë të komunës së Vitisë dyshohet se duke keqpërdorur pozitën apo autoritetin e tyre zyrtar i kanë shkaktuar dëm financiar komunës së Vitisë rreth 30 mije euro. Prokuroria kërkon aktgjykim dënues për të dyshuarit.
Fadil Abazi, Florim Ramaj, Rafiz Shabiu, Shaip Korrani dhe Selim Sejdiu, u ulën për herë të parafundit në bankën e të akuzuarve para se të bëhet shpallja e aktgjykimit.
Abazi dhe Ramaj ngarkohen për keqpërdorim të pozitës zyrtare kurse Shabiu, Sejdiu dhe Korrani për falsifikim të dokumenteve.
Të gjithë këta zyrtarë të komunës së Vitisë, sipas aktakuzës, dyshohet se i shkaktuan dëm buxhetit të komunës rreth 30 mije euro lidhur me shtrimin me asfalt dhe zhavorr në disa rrugë dhe fshatra të kësaj komune.
Në fjalën përfundimtare, prokurori, Isuf Sadiku kërkoi që ndaj të pandehurve të merret aktgjykimin dënues.
“Të njëjtit kanë kryer këto vepra penale në aktin akuzues janë vërtetuar me prova të mbledhura gjatë fazës para penale si dhe gjatë shqyrtimit gjyqësor, prova materiale dhe prova personale, andaj mbi bazën e këtyre provave konsiderojmë se të njëjtin duhet të shpallen fajtor dhe të dënohen konform dispozitave të KPRK”, tha prokurori, Isuf Sadiku.
Por njëzëri kërkuan të kundërtën avokatët e të akuzuarve, nën pretendimet se është vërtetuar se komuna nuk ka pësuar dëme financiare.
“Asnjë provë e vetme nuk është shtjellu nuk është eksplodu trupi gjykues për të vërtetuar në cfarëdo mënyre se Fadil Abazi ka kryer tri veprat penale” u shpreh avokati i Fadil Abazit, Shemsedin Pira.
“Më së miri këtë situatë e ka sqaru eksperti financiar ztori Gëzim Pajaziti i cili në eskpertizën e tij ka konstatuar në mënyrë shumë të qartë edhe e ka dëshmu këtu para neve që Komuna e Vitisë nuk ka pësu dëm material”, theksoi avokati i Florim Ramajt, Sevdail Robelli.
“Me veprimet e tij kinse është shtruar rruga e bernjaëve dhe rruga e ladvise së UCK-së me zhavorr konsideroj që kjo cështje është sqaruar në mënyrën më të mirë të mundshme, në bazë të ekspertizës gjeodezike ku e ka paraqitur gjeodeti Fisnik Loshi thekson se këtu ka pasur punime më shumë dhe është e rëndësishme se nuk ka pasur dëm”, është shprehur avokati i Rafiz Shabiut, Ilir Shaqiri.
Shpallja e aktgjykimit do të bëhet të enjten në Gjykatën Themelore në Gjilan.
Autore: Gresa Bardhecaj
