Ndihmës Sekretari i Shtetit për Çështjet Ndërkombëtare të Narkotikëve dhe Zbatimit të Ligjit, Todd Robinson vizitoi pikën e kalimit kufitar në Vermicë në kuadër të vizitës në Kosovë.
Ai u prit në takim nga Drejtori i Përgjithshëm i Policisë së Kosovës Kolonel Gazmend Hoxha, Kryeshefi Ekzekutiv i Inspektoratit Policor Kushtrim Hodaj, Drejtori i Departamentit për Hetime Kolonel Agron Nezaj dhe Drejtori i Departamentit Kufitar Nënkolonel Fehmi Xhata.
“Fillimisht Robinson u njoftua nga afër lidhur angazhimin policor në luftimin e krimit trans kufitar, trafikimin me narkotik e qenie njerëzore si dhe me procedurën e kalimit kufitar dhe të kontrollit të automjeteve që realizohet në këtë pikë kufitare, e në veçanti për kontrollin e detajuar të automjeteve që bëhet me pajisje të sofistikuara si donacion i INL-it”, thuhet në komunikatën e PK-së.
Në komunikatë thuhet se Hoxha, e njoftoj në detaje Robinson për sulmin terrorist të ndodhur me 24 shtator 2023 në veri të vendit, më saktësisht në Bajnskë të Mitrovicës, si dhe njëkohësisht e falënderoi për vizitën dhe mbështetjen e vazhdueshme me donacione që INL ka bërë dhe po bënë për Policinë e Kosovës.
Ndërsa, Hodaj nga IPK-ja njoftoj lidhur me realizimin e operacionit të suksesshëm antikorrupsion të koduar PIKA, si dhe po ashtu falënderoi z.Robinson për mbështetje ndaj IPK-së.
Në anën tjetër Robinson u nda i kënaqur me mikpritjen dhe informacionet e pranuara, ku për këtë falënderoj Drejtorin Hoxha, Hodaj, Nezaj dhe Xhata, të cilët i siguroi se INL do të vazhdoj me përkrahjen e pakursyer ndaj institucioneve të Republikës së Kosovës.