Në reagimin e Prokurorisë Speciale thuhet se raporti i Institutit të Mjekësisë Ligjore në Lozanë të Zvicrës nuk është komentuar, por vetëm janë publikuar konkluzionet.
Prokuroria thotë se siguron opinionin se provat nuk janë manipuluar.
“Prokuroria Speciale e Republikës së Kosovës (PSRK), ia bënë të qartë Ministrisë së Drejtësisë, por edhe opinionit të gjerë, se ne nuk e kemi komentuar raportin por vetëm se kemi publikuar konkluzionet e raportit të ekspertizës të Institutit të Mjekësisë Ligjore në Lozanë të Zvicrrës, lidhur me rastin e Astrit Deharit. Prokuroria Speciale siguron opinionin se në asnjë mënyrë nuk ka manipuluar me prova, por vetëm se ka prezantuar mendimin dhe konstatimin e ekspertëve të Institutit të Mjekësisë Ligjore të Lozanës në Zvicërr. Andaj, pretendimet tendencioze dhe dashakeqe të Ministres së Drejtësisë, karshi Prokurorisë Speciale janë të paqëndrueshme si dhe kanë për qëllim dezinformimin dhe manipulimin e opinionit publik”, thuhet në reagim, përcjellë teve1.info
Prokuroria ka bërë thirrje që kushdo që ka ndonjë dyshim mbi këto përfundime, le t’i drejtohet Institutit të Mjekësisë Ligjore të Lozanës për informacione shtesë.
“Prokuroria Speciale e Republikës së Kosovës, siguron qytetarët se me seriozitet do ta trajtoj rastin në mënyrë të pavarur dhe profesionale deri në zbardhjen e plotë të rastit Dehari. Po ashtu, i sigurojmë opinionin se Prokuroria Speciale në asnjë mënyrë nuk do të ndikohet nga askush që pretendon të ndërhyj në këtë rast. Çfarëdo iniciative për të goditur institucionet e pavarura të drejtësisë është jo e drejtë dhe ka për qëllim që të ulë besimin e qytetarëve në institucionin e Prokurorit të Shtetit”, thuhet në reagim.
Prokuroria ka publikuar edhe konluzionet e institutit zvicran për rastin.
Ministria e Drejtësisë ka thënë se Prokuroria është nxituar me komunikatë për raportin shtesë të Institutit zviceran në rastin e Astrit Deharit.
Në njoftimin për media nga MD-ja kanë theksuar se ende pa e pranuar familja e Astrit Deharit raportin, Prokuroria publikon 2 konkluzione dhe jo 5 sa janë në tërësi ato.
“Ende pa e pranuar familja e Astrit Deharit raportin e Institutit zviceran, Prokuroria Speciale publikon 2 konkluzione dhe jo 5 sa janë në tërësi ato. Nxitimi me komunikatë nga Prokuroria Speciale sikurse deklaratat e menjëhershme asokohe të kreut të policisë dhe të Prokurorisë Themelore në Prizren, në mënyrë të ngjashme na rikthehen sërish me deklarata të Prokurorisë Speciale, pa kurrfarë nevoje për këtë nxitim”, thuhet në njoftim.
Akuza për manipulim të provave ka dhënë edhe ministri i Brendshëm , Xhelal Sveçla, i cili ka kërkaur hetim dhe profesionalizëm në këtë rast.
