Përmes një postimi në Facebook, Sveçla ka thënë se Prokuroria Speciale është nxituar për alarmimin mbi raportin e ekspertizës nga Instituti zviceran, për rastin Dehari.
“Prokuroria Speciale, para pak ditësh nxitoi për të alarmuar mbi Raportin e ekspertizës nga Instituti zviceran, për rastin Dehari. Ndonëse në këtë raport janë 5 konkluzione, Prokuroria Speciale vendosi t’i publikojë vetëm dy prej tyre, dhe duhet ta kuptojmë pse zgjodhi të mos e jap të vërtetën e plotë. Kush ia kërkoi që me nxitim të flasë pjesshëm për një çështje e cila ka vëmendjen mbase të të gjithë qytetarëve të Republikës”, ka shkruar ai.
Sipas tij, ky rast duhet të hetohet me profesionalizëm dhe pa asnjë ndikim.
“Ky rast duhet të hetohet me profesionalizëm dhe pa asnjë ndikim. Drejtësia për të duhet të vijë në vend. Dhe në anën tjetër organet të cilat merren me këtë çështje duhet të jenë shumë të kujdesshme”, tha më tej ai.
Po ashtu, Sveçla thotë se do të angazhohet që përbrenda kompetencave që ka, të kontribuojë në sjelljen e drejtësisë për Astritin.
“Në cilësinë e Ministrit të Punëve të Brendshme, do të angazhohem që përbrenda kompetencave që kam, të kontribuojë pa kursim në sjelljen e drejtësisë për Astritin. Si shok i Astritit, s’do të rreshti së kujtuari atë dhe qëllimet tona të përbashkëta, për idealet që s’na vdesin kurrë”, përfundoi ai. /teve1.info/
