Policia e Kosovës e ka arrestuar një person në Ferizaj i cili ishte në kërkim nga autoritetet e Maqedonisë së Veriut për veprën penale “mashtrim” dhe “falsifikim i dokumenteve.
Policia ka bërë të ditur se ai është arrestuar të dielën para mesditës, pas marrjes së informatave se në një lokacion po qëndronte një person i paidentifikuar.
“Më datën 17.03.2024 rreth orës 11:50 policët e stacionit në Ferizaj kanë pranuar një informacion se në Ferizaj në një lokacion po qëndronte për disa ditë një person i paidentifikuar. Menjëherë hetuesit policorë kanë shkuar në vendin ku dyshohej se po qëndronte personi i panjohur dhe e kanë shoqëruar në stacionin e policisë në Ferizaj”, thuhet në njoftimin e policisë.
I arrestuari G.M është i dënuar me 4 vjet e 9 muaj burgim.
Autoritetet njoftuan se i dyshuari është intervistuar nëpërmjet autoriteteve ndërlidhëse, e për rastin është njoftuar edhe Departamenti i Kufirit për procedura të tjera para dorëzimit te autoritetet e Maqedonisë së Veriut./teve1.info/