Këtë e ka konfirmuar për teve1.info Bekim Kupina, këshilltar i presidentes Vjosa Osmani.
Kupina ka bërë të ditur se zyra e presidentes ka filluar të shqyrtojë dhe analizojë të gjithë dokumentacionin, faktet dhe rrethanat që lidhen me këtë proces.
“Duke ditur rëndësinë e këtij procesi, Zyra e Presidentes ka filluar të shqyrtojë dhe analizojë në detaje të gjithë dokumentacionin e pranuar, të gjitha faktet dhe rrethanat që ndërlidhen me këtë proces. Presidentja është në komunikim me palët e interesit dhe në ditët ne vijim do të takohet me përfaqësuesit e organizatave që kanë monitoruar procesin e përzgjedhjes se Kryeprokurorit për të dëgjuar vërejtjet e tyre mbi mbarëvajtjen e këtij procesi”, ka bërë të ditur Kupina.
Tutje, ai shtoi se presidentja ka theksuar se kandidati i propozuar duhet të plotësoj të gjitha kërkesat ligjore.
“Presidentja nënvizon se procesi i përzgjedhjes së Kryeprokurorit duhet të jetë kredibil dhe me integritet të plotë për të siguruar që besimi i qytetarëve ndaj Prokurorisë se Shtetit nuk dëmtohet. Po ashtu, Presidentja ka theksuar se kandidati i propozuar duhet të plotësoj gjitha kërkesat ligjore, duke përfshirë edhe atë të integritetit”, theksoi Kupina.
Këshilli Prokurorial i Kosovës më 6 prill ka votuar unanimisht për Blerim Isufajn për Kryeprokuror të ri të Shtetit. /Teve1.info/
