Ish-kryenegociatorja e Kosovës në dialogun me Serbinë, Edita Tahiri, ka theksuar se me këtë qeveri Kosova do të mbetet para dyerve të Këshillit të Evropës.
Ajo ka thënë se zbatimi i vendimit të Gjykatës Kushtetuese siç ka thënë ambasadori gjerman në Kosovë është kusht për anëtarësim në këtë organizatë.
“Me këtë qeveri Kosova do të mbetet para dyerve të Këshillit të Evropës, për anëtarësimin e të cilës i kemi votat qe nga koha e qeverisjes tonë. Ambasadori gjerman Rhode shpjegoi hapur se pa u zbatuar vendimi i Gjykatës Kushtetuese për pronën e Manastirit të Deçanit nuk do të ketë anëtarësim!”, ka shkruar Tahiri në “Facebook”.
Republika e Kosovës, zyrtarisht ka aplikuar më 12 maj të vitit 2022 për t’u anëtarësuar në Këshillin e Evropës.
Ndërsa, aplikimi ishte pranuar më 24 prill të vitit 2023. Ministria e Punëve të Jashtme dhe Diasporës kishte thënë se Këshilli i Ministrave përmbylli fazën e parë për anëtarësimin e Kosovës në Këshillin e Evropës, duke ia kaluar kërkesën për anëtarësim Asamblesë Parlamentare.
