Në pjesën e dytë të sesionit, Rrahimi iu përgjigj pyetjeve të ZPS-së mbi kontaktet që ai kishte me ish-pjesëtarin e UÇK-së Salih Mustafën.
Prokurori u interesua të di se në kohën e luftës kur ai po e transportonte Nuredin Ibishin dhe Kapllan Parduzin pasi ishin të plagosur, nofka “Cali” e Salih Mustafës a kishte ndonjë rëndësi për dëshmitarin, ky i fundit tha se nuk ka pasur asnjë rëndësi për të.
Më pas prokurori kërkoi të di më shumë detaje për momentin kur Rrahimi e kishte dëgjuar një person duke e thirrur “Cali”, dhe ai tha se kjo kishte ndodhur gjatë tejkalimit të traktorit të tyre.
“Kanë qenë në një distancë afër traktorit kur ka ardhur në tejkalim dhe ka thënë vetëm në të djathë apo të majtë “Cal” me sa më duket dy herë dhe pastaj traktori ka vazhduar në distancë 200 metra para nesh“, tha ai.
Prokuroria e ballafaqoi dëshmitarin Shaqir Rrahimi me dëshminë e tij ku sot i tha mbrojtjes se nuk kanë biseduar me këta dy personat që i kishin shoqëruar nga Koliqi deri në Rimanishtë. Ndërsa, pas pyetjes së ZPS-së, ai tha e kanë pasur një kontakt të shkurtër.
Pyetje-përgjigje:
Dëshmitari: Kanë qenë 23 vjet.
Prokurori: Cila është përgjigjja e vërtetë, a keni pasur kontakte a është absolutisht jo, apo po?
Dëshmitari: Kur e kam ndalur traktorin, kurrgjë nuk ka ndodhur. Asnjë bisedë tjetër nuk kam… Diçka nuk po funksionon. Kontakt në distancë tri metra. Nuk e llogaris kontakt atë dhe jam duke e thënë të vërtetën dhe çka ka ndodhur, kurrgjë nuk ka ndodhur, kaq shkurt ka qenë ai takim.
Në Dhomat e Specializuara të Kosovës në Hagë është duke vazhduar procesi gjyqësor ndaj ish pjesëtarit të UÇK-së, Salih Mustafës. Mustafa është arrestuar më 24 shtator 2020 me pretendimin për krime lufte. Ai po qëndron në paraburgim në Hagë ndërsa në paraqitjen e tij para trupit gjykues është deklaruar i pafajshëm./KP
