Azdren Shala nga Partia Social Demokrate, (PSD), ka folur lidhur me arrestimin e sotëm të nëntë aktivistëve të kësaj partie në Bibliotekën Kombëtare, për të cilin tha se ishte i qëllimshëm dhe i dhunshëm.
Shala më tej, vlerësoi se kjo qeveri përmes policisë po dëshiron të frikësojë çdo zë opozitar në Kosovë.
“Arrestimi përveç i qëllimshëm ishte edhe i dhunshëm. Një dhunë e tillë që është në shpërputhje me krejt protokollet e policisë është e pa pranueshme, kjo qeveri përmes policisë që e ka bërë aparatin e saj të preferuar do ta frikësojë çdo zë opozitar në Kosovë. Prandaj kjo për ne është një problem shtesë që kjo qeveri ka në qeverisje”, është shprehur ai në emisionin “Ditari” në Tëvë 1.
Sipas Shalës, lirimi i aktivistëve të tyre pas arrestimit është shumë i arsyeshëm meqenëse siç thotë ai, përmes aksionit ata vetëm kanë dashur të shpërfaqin dështimet e ministres së Arsimit, Arbërie Nagavci.
Ndërkohë, Shala ka thënë se kjo qeveri e ka çrrënjosur arsimin nga themelet e çerdheve deri te kulmi i sindikatës.
“Ne sot e patëm një aksion simbolik ku provonim të tregonim se si kjo qeveri që e ka çrrënjosur arsimin nga themelet e çerdheve deri te kulmi i sindikatës, mjetin e vetëm të edukimit e ka bërë dhunën policore. Gjithashtu provuam që të tregojmë dështimet e njëpasnjëshme të ministres Nagavci. Gjatë përpjekjes sonë për ta shfaqur aksionin, ta shfaqnim protestën tonë dhe të përçonim mesazhin tonë, Policia e Kosovës ka ndërhyrë me pretekstin se po e pengojmë një ceremoni që e ka organizuar Qeveria e Kosovës për 7 marsin. Arrestimi i aktivistëve të cilët të mbajtur në paraburgim, pas një ore janë liruar sepse nuk kanë pasur asnjë fakt dhe asnjë arsye me i mbajt. I paarsyeshëm ka qenë arrestimi i tyre, shumë i arsyeshëm lirimi i tyre” ka shtuar ai.
Gjatë ditës, Policia e Kosovës ka arrestuar disa prej anëtarëve të PSD-së, të cilët kanë rezistuar të dalin nga Biblioteka Kombëtare. Ata kanë penguar fillimin e manifestimit për 7 Marsin – Ditën e Mësuesit.
