Gazetari nga Republika e Maqedonisë së Veriut, Fitim Kryeziu ka deklaruar se asnjëri nga kandidatët shqiptarë, nuk ka gjasa teorike që të zgjedhet president.
Kryeziu ka theksuar se vetëm në vitin 2014, shqiptarët kanë pasur vetëm një kandidat për këtë pozitë.
“Këto zgjedhje dallojnë shumë prej të zgjedhjeve të kaluara parlamentare dhe presidenciale. Vlen të theksohet fakti që vetëm në vitin 2014 kemi pasur vetëm një kandidat shqiptar,Iliaz Halimi i cili ka tubuar 38 mijë vota. Kam përshtypjen që të dyja kampet politike tek elektorati shqiptar nuk janë duke luajtur me sinqeritet të plotë ndaj votuesit. Edhe Ali Ahmeti edhe Taravari në vazhdimësi kanë theksuar se asnjëri nga kandidatët shqiptar nuk ka gjasa teorike të zgjedhet president” është shprehur ai në emisionin “Këndi i Debatit” në Tëvë 1.
Për Kryeziun, kandidatët si Bujar Osmani e Arben Taravari, kanë qenë jashtëzakonisht të mirë në drejtimin politik, andaj ndarja në dy blloqe e bën sipas tij të pamundur që njëri të fitojë 250 mijë vota.
Sipas tij, duke qenë se dalshmëria e shqiptarëve në votim është e ulët, është absurde të mendohet se njëri nga kandidatët të marr votat e duhura, shto faktin që siç thotë Kryeziu nga viti 2009 e këndej asnjëherë nuk kanë dal në zgjedhje 250 mijë vota shqiptare.
“Nëse kapim matematikisht numrat që një kandidat që të kalojë raundin e dytë, i duhen minimumi të siguroj 200 deri 250 mijë vota, që do të ishte e pamundur. Tani në rastin konkret kur i kemi dy kandidatura tek shqiptarët të dyja forta, për shkak se edhe Bujar Osmani edhe Taravari si individ, kanë qenë njerëz që jashtëzakonisht shumë mirë kanë menaxhuar punët në drejtimin politik. Tani kur të shpërndahet vota shqiptare në dy blloqe, a ka mundësi që njëri nga këta dy kandidat të arrij shifrën e 250 mijë votave, është absurde, për shkak se ne e dimë trupin votues. Nga viti 2009 e këndej asnjëherë nuk kanë dal 250 mijë vota shqiptare, ose 300 mijë që të jemi më të sigurt, për shkak se dalshmëria të shqiptarët është e ulët, diku rreth 50 për qind kemi”, ka shtuar ai.
Më tej, mos daljen e shqiptarëve në zgjedhje, gazetari po e lidh me krizën sociale dhe dëshpërimin e të rinjve nga politikëbërja në Maqedoni.