Ai gjatë vizitës që i ka bërë në Shërbimin Spitalor të Kosovës, bashkë me ministrin Rifat Latifi tha se Izraeli është i interesuar të investojë si në infrastrukturë ashtu edhe në përgatitjen e kuadrove.
“Jemi të gatshëm si kurdo herë që të kontribuojmë në përmirësimin jo vetëm të infrastrukturës shëndetësore, por edhe më përgatitjen e kuadrove shëndetësore kosovare”,tha ministri izraelit.
Ministri për Bashkëpunim Regjional i Izraelit, Esawi Freji, për të cilin kjo është vizita e tij e parë në Kosovë, tha se Qeveria e Izraelit, e ka në prioritet bashkëpunimin dhe mbështetjen e Kosovës, duke i vlerësuar si të rëndësishme raportet miqësore dhe bashkëpunimin korrekt në mes Kosovës dhe Izraelit, sidomos për shërimin e fëmijëve nga sëmundje që nuk mund të trajtohen plotësisht në Kosovë.
Nga ana tjetër ministri Latifi u shpreh i gatshëm për të bashkëpunuar me Qeverinë e Izraelit, pasi që të dy vendet kanë marrëdhënie të mira ndërshtetërore, ndërsa veçoi mbështetjen e Izraelit për shërimin e fëmijëve kosovarë.
Deri më tani, janë 6 fëmijë nga Kosova të cilët janë kuruar në Izrael, dhe për këtë ministri Latifi, u shpreh se është mirënjohës për një kontribut të tillë./teve1.info/
