Lulzim Jashari, djali i komandantit, Adem Jashari, para të pranishmëve në ceremoninë e “Epopesë së UÇK-së” ka thënë se armët e paraardhësve tanë nuk u ndotën kurrë me gjakun e civilëve, por ato shënjestruan vetëm uniformën e pushtuesve.
Sipas Lulzimit, arma e shqiptarit, shkrepi vetëm në emër të mbrojtjes së shtetit dhe kombit, pra vetëm në emër të lirisë.
“Të dashur ushtar ju keni një traditë të pastër dhe të pasur, traditat e ushtarëve të Skënderbeut, luftëtarëve të lidhjes së Prizrenit, luftëtarëve që shpallën Shqipërinë të pavarur, traditën e UÇK-së dhe të gjithë atyre që luftuan për lirinë dhe nderin e kombit. Armët tuaja, mos harroni asnjëherë janë armët më të pastra në Ballkan dhe më gjerë. Armët e paraardhësve nuk u ndotën kurrë me gjakun e civilëve, ato shënjestruan vetëm uniformën e pushtuesve. Arma e shqiptarit, shkrepi vetëm në emër të mbrojtjes së shtetit dhe kombit, pra vetëm në emër të lirisë. Këtë traditë madhështore duhet ta ruajmë dhe tua trashëgojmë brezave.
Më tej, Jashari tha nëntori dhe marsi janë muaj kur kthejmë vështrimin prapa për ta parë traditën tonë por edhe për të vlerësuar të tashmen dhe planifikuar të ardhmen.
“Në këtë ditë të shënuar është nder dhe privilegj të flasësh para uniformës së ushtarëve tanë, para atyre që po të jetë nevoja do të jenë të parët që jetën e tyre do ta vënë në mbrojtje të atdheut. Nëntori dhe marsi janë muaj kur ne më shumë se herave tjera kthejmë vështrimin prapa për ta parë traditën tonë por edhe për të vlerësuar të tashmen dhe planifikuar të ardhmen”, shtoi ai.
