Shefi i grupit parlamentar i AAK-së, Besnik Tahiri, ka thënë se 5, 6 dhe 7 Marsi shënojnë kthesën e madhe për Kosovën.
Sipas Tahirit, shtëpia e familjes Jashari, ishte kthyer në qendrën e rezidentes dhe të frymëzimit të UÇK-së.
“Baci Shaban me të bijtë, Ademin dhe Hamzën, i kishin të njohura faktet e rezistencës dhe fatin e popujve që nuk ecin në atë rrugë. Këto data shënojnë kthesën e madhe për Kosovën, aty ku ndryshoi ora e historisë, aty ku u bë një epokë. Shtëpia, oda e familjes Jashari ishte kthyer në Kuvendin e shumë takimeve të luftëtarëve për liri, vinin nga Drenica, Dukagjini, Llapi, Shala e Bajgorës dhe nga të gjitha trojet shqiptare. Ky vend i shenjtë u kthye në qendrën e rezidentes dhe të frymëzimit të UÇK-së”, u shpreh ai.
Më tej, Tahiri tha këto data janë burim shpirtëror për lirinë, ndjenja më sublime për sakrificë e luftë për liri.
“Sakrifica dhe rënia ishte ndërtuar mbi motive e ideale të qarta të tilla që nuk mund të gjenden në një shembull kaq unik. 5,6 dhe 7 marsi nuk janë thjesht data, ato janë kulmimi i një trashëgimie, burim shpirtëror për lirinë, ndjenja më sublime për sakrificë e luftë për liri”, shtoi Tahiri.
