Ish-zëvendësministri i Brendshëm, Selam Shkodra e cilësoi lajm shumë të mirë për shqiptarët hapjen e bazës së re ajrore të NATO-s në Kuçovë të Shqipërisë.
Madje sipas Shkodrës, ky është një vlerësim i madh i faktorit shqiptarë nga aleanca atlantike e kryesuar nga Shtetet e Bashkuara të Amerikës, shkruan teve1.info.
“Lajm i mirë për rajonin dhe shqiptarët, për stabilitetin dhe sigurinë në rajon. Veçanërisht është një vlerësim i madh i faktorit shqiptarë nga aleatët, aleanca atlantike të kryesuar nga Shtetet e Bashkuara të Amerikës, për shkak se në shiqim të parë mund të duket si një bazë ushtarake por është një koncept i sigurisë së përgjithshme. Investimet janë diku rreth 50 milionë dhe mendohet që është ndër bazat që mund të kontrollohet i gjithë deti mesdhe”, tha Shkodra në emisionin “InfoNata” në Tëvë1.
Më tej, Shkodra tha se ky vendim është vlerësim edhe për kombin shqiptarë në tërësi.
“Po shihet qartë që Shtete e Bashkuara të Amerikës vlerësojnë faktorin shqiptarë dhe në tërësi popullin shqiptarë, kombin shqiptarë si i vetmi komb që jeton në këtë pjesë të Gadishullit Ballkanik e që nuk është me përkatësi sllave”, shtoi ai.
Ndryshe, kryeministri i Shqipërisë, Edi Rama gjatë fjalës së tij në ceremoninë e inaugurimit të bazës ajrore taktike të NATO-s në Kuçovë, u shpreh se rëndësia e saj i tejkalon kufijtë e vendit.
Ai theksoi se baza e re është një element i shtuar sigurie për rajonin, i cili është i rrezikuar nga ambiciet neo-imperialiste të Federatës Ruse.
Për rindërtimin e bazës së Kuçovës u deshën 2 vite punime dhe 50 milionë Euro investim.
Baza e Kuçovës është ndërtuar në vitin 1955, si baza e parë ajrore shqiptare dhe në 20 vitet e fundit ka shërbyer kryesisht për stërvitjen e pilotëve të Forcave të Armatosura. Kthimi në një bazë taktike të NATO-s do t’i japë mjeteve ajrore të aleancës të dislokohen në Kuçovë gjatë operacioneve strategjike në Ballkanin Perëndimor./teve1.info./