Në prag të muajit të Ramazanit, Turqia dërgon një kontigjent me pesë mijë pako ushqimore. Me to do të furnizohen mijëra familje në të gjitha komunat e Kosovës. E shpërndarja filloi në kryeqytet, ku u furnizuan 200 familje nevojtare.
Pakot i kanë renditur para Këshillit të Bashkësisë Islame në kryeqytet.
Të tjerat, ende po i nxjerrin nga kontingjenti.
Të ardhura nga Turqia në Kosovë mëngjesin e së hënës, pakot ushqimore po bëhen gati për shpërndarje.
Me to do të furnizohen 200 familje në Prishtinë.
Në mesin e tyre edhe Roza nga Shkodra, e cila tash e 24 vjet jeton në këtë zonë.
“Kjo pako ushqimore është e nevojshme shumë se shyqyr që po na japin edhe falë, se shko e bleje kushton 50 euro, me çka me i ble as s’kam pension as s’kam social”, u shpreh Roza nga Shkodra.
Edhe për Bahrije Gashin, pakoja ushqimore është më se nevojshme.
“Jam nanë e 16 fëmijëve, Allahu e shpërbleftë këtë donacion kush e ka dhuru për këtë muaj të Ramazanit. Pak pak na del boll, çka me bo”, deklaroi Bahrije Gashi.
Në të gjithë vendin, me pako ushqimore do të furnizohen mijëra familje.
E gjitha kjo, në prag të muajit të Ramazanit.
“Sot na kanë ardhë edhe 5 mijë pako në nivel të krejt Kosovës, ku ne do të bëjmë shpërndarjen këtu nga kryeqyteti – nga Prishtina. Sot do të startojmë me 200 pako për familjet në nevojë”, tha Hetem Sopjani nga Bashkësia Islame në Prishtinë.
Kurse shpërndarja e pakove po bëhet përmes Ministrisë së Kulturës së Turqisë dhe Shoqatës së Vakëfit.
“I falënderojmë vëllezërit tanë që i kemi pranu këto pako ushqimore edhe para muajit të bekuar të Ramazanit. Këto ndihma nuk janë vetëm ushqimore. Do të vazhdojmë natyrisht edhe si Drejtori e Vakëfeve që të ndihmojmë edhe në restaurimin e xhamive në Kosovë”, deklaroi Musa Çelebi – koordinator / ministria e kulturës e Turqisë.
Shpërndarja e pakove ushqimore ka filluar në Prishtinë, Obiliq e Lipjan, për të vazhduar ditët në vijim edhe në komunat tjera të Kosovës.