Kryeministri i Kosovës, Albin Kurti ka zhvilluar takim me kryeministrin e Irlandës, Leo Varadkar.
Në këtë takim sipas komunikatës është diskutuar për marrëdhëniet dypalëshe, bashkëpunimi në fushën e ekonomisë, tregtisë e teknologjisë, dhe zhvillimet rajonale.
“Bashkë diskutuan për mundësitë e thellimit të tyre në të gjitha fushat me interes të përbashkët. Duke u shprehur falënderues për mikpritjen që ka pranuar në Dublin dhe për mbështetjen e zëshme dhe të vazhdueshme të Irlandës ndaj Kosovës, Kryeministri Kurti e njoftoi kryeministrin irlandez Varadkar me zhvillimet e fundit në vend, progresin e shënuar deri më tani dhe ofertën që Kosova paraqet për investime të kompanive irlandeze, me theks në sektorin e teknologjisë”, thuhet në komunikatë.
Ai e falënderoi kryeministrin Varadkar për përkrahjen aktive ndaj Kosovës në procesin e integrimeve evropiane dhe në anëtarësimin e saj në Këshillin e Evropës.
Kurti po qëndron për vizitë në Irlandë, pas vizitës në Britaninë e Madhe.
