Presidentja e Kosovës, Vjosa Osmani, në Forumin Diplomatik të Antalisë tha se përkundër gjenocidit të kryer në vend nga Serbia, Kosova ka zgjedhur dialogun si të vetmen rrugë për të vazhduar para.
Osmani ka deklaruar se nga përvoja e saj mund të mësohet se sa është e vështirë të zgjedhësh paqen dhe demokracinë edhe në kohë lufte.
“Ne kemi tejkaluar pushtimin shekullor, kemi qenë viktima të gjenocidit për shumë vite, viktima të krimeve të luftës, kemi numrin më të madh të fëmijëve të vrarë në Ballkan. Përkundër gjithë kësaj dhimbjeje ne kemi zgjedhur dialogun si të vetmen rrugë përpara. Edhe nga përvoja ime personale edhe nga përvoja e secilit person mund të mësojmë se sa e vështirë është të zgjedhësh paqen dhe demokracinë edhe në kohë lufte”, theksoi ajo.
Tutje, Osmani u shpreh se shembulli i ndihmës që i është dhënë Kosovës nga ndërkombëtarët duhet të ndiqet nga të gjithë.
“Në kohë trazirash, në kohë tensionesh është shumë me rëndësi të dihet se kush qëndron përkrah teje. Fuqia jonë është fuqia e partneriteteve tona. Si presidente kam kuptuar se distanca gjeografike nuk ka rëndësi. Nuk ka lidhje se sa larg jemi, mund të kemi miqësi e partnerë që do të qëndrojnë përkrah atëherë kur të duhen më së shumti. Derisa ballafaqohemi me konflikte në botë dhe janë gjithmonë të pafajshmit që vuajnë më së shumti, shembulli i Kosovës, ku shtetet e gjithë botës nuk i kanë mbyllur sytë dhe na kanë dalë në ndihmë, është shembull që duhet të ndiqet”, shtoi presidentja.
Gjithashtu, ajo tha se Serbia është bërë dorë e zgjatur e Rusisë për të destabilizuar rajonin.
“Përtej faktit që jemi fqinjë me Serbinë, që fatkeqësisht jo vetëm tash së voni por për një kohë të gjatë, është bërë një dorë e zgjatur e Rusisë në përpjekje për të destabilizuar rajonin. Nuk mund të gjejmë ndonjë ndikim rus brenda Kosovës, e kjo na ka ndihmuar edhe në luftën tonë ndaj propagandës ruse, e cila është e stër-madhe në rajonin tonë. Historikisht Rusia është përpjekur të gjejë teren të pjellshme ku do të mund të zgjeronin konfliktin. Gjithmonë e kanë parë Ballkanin Perëndimor si një prej këtyre tokave pjellore për konflikt. Kemi pasur krizë pas krize në rajon për shkak se interesi rus ka qenë që ta kthejë rajonin tonë në të 90-at kur ka pasur luftëra e konflikte”, tha presidentja Osmani.
E para e shtetit të Kosovës është pjesë e panelit kryesor të liderëve, me temën e forumit të sivjetmë “Avancimi i diplomacisë në kohë trazirash”.
