Në rrjetet sociale ndau hallin e saj për çmimet e barnave që po përdorë.
Kjo pasi në tri barnatore, çmimi i barnave ishte i ndryshëm.
E këtë problem, Qeveria e Kosovës kishte premtuar se do ta zgjidhte qysh para shtatë muajsh.
Ndonëse Ligji për Çmimin e Produkteve Mjekësore ka kaluar, zbatimi i tij ende nuk ka filluar.
Shkak për këtë, sipas Ministrisë së Shëndetësisë, mbetet një interpretim ligjor për dy anëtarë të komisionit.
“Ju informojmë se Komisioni ka filluar punën me datë 22/01/24 dhe është në pritje të një interpretimi ligjor rreth përbërjes se komisionit, ku dy nga anëtarët e grupit janë në pritje të përgjigjjes nga autoriteti kompetent që zbaton LIGJIn Nr. 06/L -011 PËR PARANDALIMIN E KONFLIKTIT TË INTERESIT NË USHTRIMIN E FUNKSIONIT PUBLIK”.
Në momentin që kjo situatë tejkalohet, Komisioni është i gatshëm të punoj intensivisht në mënyrë që Lista e çmimeve të produkteve medicinale të publikohet sa më shpejtë!”, thuhet nga MSH.
E njëri prej dy anëtarëve që po pret përgjigje është nga Oda e Farmacistëve të Kosovës.
“Kanë kërkuar nga Oda e Farmacistëve edhe një anëtar të delegohet që të jetë pjesë e komisionit. Ne e kemi dërguar mirëpo nuk kemi marrë ende një përgjigje zyrtare nga MSH për të deleguarin nga Oda e Farmacistëve”.
Ndërsa rregullimin e çmimit të barnave, Arsim Haxhijaha, nënkryetar i Odës së Farmacistëve sheh të domosdoshëm.
“Deri më tani për komunitetin tonë është një lajm shumë i madh, vetëm po presim zbatimin e tij. Sepse me zbatimin e këtij ligji në mënyrë direkte do të ndikojë në uljen e çmimit të barnave për pacientët dhe minimizohet tregtimi i produkteve ilegale apo kontrabandë dhe në anën tjetër eliminohet pjesa e konkurrencës me çmime dhe futet konkurrenca në mënyrë profesionale”, thotë ai.
Ligji për rregullimin e çmimeve të barnave ka kaluar në korrik të vitit të kaluar, ndërsa synon unifikimin e çmimeve për blerjet publike por edhe tregun privat.
