Deputeti i LDK-së, Besian Mustafa në një konferencë për media ka thënë se LVV-ja me këtë masë po synon blerjen e paqes sociale dhe shitjen e paaftësisë së Qeverisë.
Mustafa thotë se qytetarët e Kosovës kanë nevojë për zhvillim ekonomik afatgjatë e jo lëmosh të skemave sociale.
“Kjo përfundon duke qenë vetëm një masë populiste që synon blerjen e paqes sociale dhe shitjen e paaftësisë së Qeverisë. I rikujtojmë qeverisë se qytetarët kanë nevojë për zhvillim ekonomik afatgjatë e jo lëmosh të skemave sociale. I bëjmë thirrje që sa më parë të përqendrohet në investimet e mëdha kapitale që gjenerojnë të mira ekonomike afatgjate për të gjithë qytetarët e Kosovës, sepse me 100 euro politike nuk mbulohet kriza e as nuk ofrohet zgjidhje ekonomike”, ka thënë ai.
Sipas tij, me 100 euro politike nuk mund të mbulohet skandali i shkeljes së Kushtetutës në vazhdimësi, e as nuk mund të mbulohet nepotizmi.
“Me 100 euro politike nuk mund të mbulohet skandali i shkeljes së kushtetutës në vazhdimësi. Me 100 euro politike nuk mund të mbulohet nepotizmi i skajshëm, konflikti i interesit dhe kapja e institucioneve të pavarura. Me 100 euro politike nuk mund të mbulohet afera super printo e konkursit në KEK. Me 100 euro politike nuk mund të mbulohet dështimi në politikën e jashtme. Me 100 euro politike nuk mund të mbulohet lufta e pa precedent ndaj mediave. Me 100 euro politike nuk blihet paqja sociale, nuk mund të shitet paaftësia qeverisëse dhe as mashtrimi qeverisës”, tha më tej Mustafa. /teve1.info
