Deputeti i Vetëvendosjes, Valon Ramadani, thotë se zëvendëskryeministri i Kosovës, Besnik Bislimi, mirë ka bërë që ka refuzuar takimin e kryenegociatorëve për të diskutuar për çështjen e dinarit në Bruksel.
Ramadani thotë se çështja e dinarit nuk është temë e kryenegociatorëve të Kosovës e Serbisë.
“Përderisa është vendim i guvernatorit, mendoj që mirë ka bërë zëvendëskryeministri që një çështje çka i takon guvernatorëve, guvernatorit të Kosovë ose të guvernatorit të Serbisë, ose të Gjermanisë atëherë është nivel i tyre që duhet të diskutojnë nëse ka pasur të drejtë më vendimin apo jo, ose nëse janë respektuar ato rregullore të cilat i kanë nxjerrur, ose i nxjerrin në vazhdimësi. Por, mund të diskutohet për të në forma të ndryshme – ka tema e tema e marrëveshje që po zbatohen tash ose janë zbatuar më herët, ose po dakordohen tash e do dakordohen në të ardhmen, pra nuk është çështje dinari që të ulën e të… në këtë rast unë mendoj që mirë ka bërë zëvendëskryeministri që nuk e ka bërë temë mes negociatorëve çështjen e dinarit, kur nuk është temë e tyre”, tha ai në emisionin “Info Nata” në Tëvë1.
Ai tha se në procesin e dialogut Kosovë – Serbi, duhet të diskutohen tema të sakta e jo të shkohet në sistemin ad-hoc.
“Duhet të ketë saktë tema, të cilat duhet të diskutohen e jo të shkohet në këtë sistem ad-hoc. Ka misione ad-hoc, ka mbledhje, por për këtë çështje mes dialogut Kosovë – Serbi nuk është dashur kaq ad-hoc një çështje që në këtë rast shumica e qytetarëve janë duke i bërë pagesat në euro edhe po tejkalohet si proces pa aksese”, shtoi ai.
Më 20 shkurt, Bislimi tha se e refuzoi një ftesë të Brukselit për të biseduar lidhur me çështjen e ndalimit të dinarit serb në Kosovë dhe e akuzoi të dërguarin e posaçëm të BE-së për dialogun mes Kosovës dhe Serbisë, Mirosllav Lajçak, për shkelje të parimeve.
Bislimi tha se, Lajçaku, me dërgimin e kësaj ftese, kishte shkelur “parimet që i ka vendosur vetë”, pasi, sipas tij, “është hera e parë që ai ka caktuar një takim pa pajtim paraprak me palët dhe është munduar që të përcaktojë agjendën përkundër parimeve që ai ka vendosur në vitin 2021, që asnjë temë nuk vendoset në agjendë pa pajtimin e palëve”./teve1.info/
