E deklaratat e së mërkurës të zëvendëskryeministrit të Kosovës, Besnik Bislimi po shihen si të papranueshme nga zyrtarët e Bashkimit Evropian. Zëdhënësi i BE-së, Peter Stano thotë se kjo gjë nuk u bë pa dakordim. Me sjelljen e Bislimit nuk pajtohen as përfaqësuesit e opozitës dhe njohësit e politikës.
Deklarata e zëvendëskryeministrit të Kosovës Besnik Bislimi që nuk merr pjesë në takimin e 27 shkurtit në Bruksel ka ngjallur reagime.
Këtë sjellje të Bislimit e konsideron të papranueshme zëdhënësi i Bashkimit Evropian, Peter Stano.
“Shpresojmë që z. Bislimi do ta vlerësonte përpjekjen, në vend që të akuzonte në mënyrë të pavend dhe pa bazë zyrtarët e BE-së. një sjellje e tillë është e papranueshme”, ka thënë zëdhënësi i BE-së, Peter Stano.
Madje Stano thotë se BE-ja nuk e ka specifikuar se kush duhet të marrë pjesë.
“Kjo iu kishte lënë palëve të vendosin”, është shprehur Stano.
Si skenar të Rusisë po e sheh këtë sjellje të Bislimit, kryetari i Aleancës për Ardhmërinë e Kosovës, Ramush Haradinaj.
E shefi i grupit parlamentar të Partisë Demokratike të Kosovës, Abelard Tahiri po kërkon zgjedhje të jashtëzakonshme.
Nga ana tjetër, profesori universitar Dritëro Arifi thotë se po krijohen dëme të riparueshme për vendin.
Të mërkurën, zëvendëskryeministri i Kosovës, Besnik Bislimi tha se refuzon ftesën e Brukselit për të diskutuar rreth dinarit serb në tavolinën e bisedimeve me Serbinë.
Për Bislimin, kjo çështje nuk është për takim të kryenegociatorëve pasi nuk është pjesë e dialogut në mes dy palëve.