Në gjykatore erdhi në cilësinë e dëshmitarit, por gabimisht u drejtua për kah banka e të akuzuarit.
Deputeti Pal Lekaj zuri vendin e tij, para se të vinte i pandehuri, kryetari i Kuvendi, Glauk Konjufca.
Ky i fundit kërkoi këshilla nga Lekaj për gjykimet.
Në dëshminë para gjykatës, Lekaj u shpreh se nuk i kujtohet se çka ka ndodhur në mbledhjen e Kryesisë së 10 gushtit 2016, për të cilën Konjufca akuzohet se ka hedhur gaz lotsjellës.
Procesi vazhdoi me administrimin e provave.
E diskutim zgjoi një provë e re e prokurorisë, të cilën nuk e posedonin as Gjykata as pala e akuzuar.
Avokatja e Konjufcës, kërkoi që prova e re të mos pranohet pasi nuk është siguruar ashtu siç e përcakton ligji.
Megjithatë, Gjykata e pranoi këtë provë.
Mundësinë për t’u deklaruar sërish rreth akuzave, nuk e shfrytëzoi kryekuvendari Konjufca.
Sipas aktakuzës, Konjufca akuzohet se në mbledhjen e Kryesisë së Kuvendit më datë 10 gusht 2016, në cilësi të deputetit, Konjufca ka hedhur gaz lotsjellës në sallë, duke e pamundësuar vazhdimin e saj.
