Hoti përmes një postimi në Facebook është shprehur se kjo ndihmë nuk është zgjidhje, nuk përfshinë mijëra të papunë dhe ata që merren me bujqësi.
“Vendimi i sotëm reflekton varfërinë e politikave fiskale dhe sociale të Qeverisë për të mbrojtur standardin e jetës së familjeve. Kjo ndihmë e njëhershme prej 100 euro, sado e dobishme, nuk e zgjidh problemin e rritjes së çmimeve. Për më tepër, kjo ndihmë nuk përfshinë mijëra të papunë dhe ata që merren me bujqësi”, ka shkruar ai, përcjell teve1.info.
Hoti më tej ka shtuar se duhet ndërmarrë masa afatgjate dhe ka përmendur propozimet që i ka bërë LDK-ja kur ka filluar të shfaqet kriza.
“Duhet ndërmarrë masa afatgjate, të cilat i kemi propozuar kur filloi të shfaqet kriza:
(i) Nuk është dashur të rritet çmimi i energjisë.
(ii) Duhet të indeksohen përfitimet pensionale dhe sociale për normën e inflacionit të çmimeve të produkteve ushqimore bazike.
(iii) Duhet të rriten subvencionet në bujqësi.
(iv) Duhet të rritet paga minimale
(v) Duhet konsideruar tërheqjen e një shume të kursimeve pensionale”, ka shkruar Hoti.
Përndryshe, Kryeministri i Kosovës, Albin Kurti sot në një konferencë për media ka njoftuar se do të dyfishohet vlera e asistencës sociale për të gjitha kategoritë për muajin prill dhe do të ketë rritje të pensioneve nga 100 euro si dhe të gjithë punëtorët e sektorit publik, sektorit privat dhe studentët do të përfitojnë nga 100 euro shtesa për muajin prill./Teve1.info
