Në 35 vjetorin e Grevës së Minatorëve të Trepçës, u kujtua mundi dhe sakrifica e tyre, ndërsa për minatorët e tanishëm u kërkuan kushte më të mira për punë.
Në hyrje të minierës, minatorët e rinj po i presin ata të vjetrit.
Për të shënuar 35 vjetorin e Grevës së Minatorëve të Trepçës këtu po vijnë edhe përfaqësues qeveritarë e të opozitës.
Ndërsa në mensën e minatorëve, ish grevistë të vitit 1989 u rikthyen sërish.
Rezistencën e filluar nga nëntoka e Stantërgut, e kujtoi Kryeshefi i Ndërmarrjes ‘’Trepça’’, Bashkim Kurti.
“Sot në 35-vjetorin e Grevës së Minatorëve le të kujtojmë për të mos harruar kurrë trashëgiminë, djersën, mundin dhe triumfin që ndërtuan themelet e së ardhmes së kombit tonë. Pranojmë sfidat përpjekjet më të cilat përballen minatorët si lufta për siguri, trajtim të drejtë dhe menaxhim të përgjegjshëm”, ka thënë kryeshefi i Ndërmarrjes Trepça, Bashkim Kurti.
Ndërsa kryeministri, Albin Kurti tha se Qeveria po e mbështetë Trepçën vazhdimisht me investime.
“Kemi mbështetur Trepçën me mjete për investime kapitale dhe kapital pune. Janë dhënë 25 milionë euro subvencione gjatë këtyre 3 viteve të fundit dhe po e përkrahim sërish Trepçën me kredi 20 milionëshe për të investuar në teknologjinë e re, e cila e rrit efiçiencën e prodhimin, e ngrit performancën operative-financiare, përmirëson kushtet e punës, por edhe hap vende të reja të punës”, u shpreh kryeministri i Kosovës, Albin Kurti.
E në këtë përvjetor pati edhe mysafirë, të cilët dhanë kritika për qeverinë.
Ndërsa Komuna e Mitrovicës kërkoi nga qeveria, standarde më të mira për minatorët.
E për atë që kaluan ish-grevistët dikur, para të pranishmëve foli kryetari i Sindikatës së Minatorëve, Ibrahim Jonuzi.
Viti 1989 u kujtua edhe me poezi.
E pas kësaj u vizitua edhe ekspozita në hyrje të minierës së Trepçës.
Përmes grevës e cila zgjati tetë ditë, minatorët kërkuan të drejtat kushtetuese dhe protestuan kundër revokimit të autonomisë së Kosovës të garantuar sipas Kushtetutës së vitit 1974 të Jugosllavisë Socialiste.