Infermierët e Qendrës Klinike Universitare të Kosovës (QKUK) nga data 26 shkurt do të fillojnë grevën.
Kështu ka bërë të ditur anëtari i Odës së Infermierëve, Enlirat Duraku, i cili ka njoftuar se greva nis nga ora 12:00.
Duraku thotë se greva do të vazhdojë deri në realizim e gjashtë kërkesave.
“Drejtoria e Infernierisë në QKUK, pagesa e shtesave të tregut dhe shtesave për nënpunës shëndetësor në sistemin publik shëndetësor, respektivisht përfshirjen e komuniteteve tona në Ligjin e Pagave, pagesën e punës gjatë vikendeve, pagesën e punës gjatë festave, pagesën e rrezikshmërisë dhe pagesën e orëve shtesë”, ka shkruar ai në Facebook.
Ai thotë se janë të mirëseardhur të gjithë ata kolegë që kanë guxim të ndajnë të njëjtin mendim me grevistët dhe shoqatat sindikale brenda QKUK-së.
”Janë te mirëseardhur të gjithë ata kolegë që kanë guxim dhe që ndajnë të njëjtin mendim me ne si infermier dhe shoqatat sindikale brenda QKUK-së të cilat realisht kanë guximin te na bashkëngjiten në grevë, ndërsa nuk pres qe OIK t’a mbështetë grevën fizikisht, mirëpo vetëm përmes një postimi në rrjetin social i cili nuk ka asnjë peshë sinjifikante apo edhe ndikim”, thuhet në reagimin e Odës.
Gjithashtu, Duraku tha se “pa dyshim që do kujdesemi që shërbimet jetike sipas legjislacionit në fuqi dhe Ligjit për Grevat të jenë funksionale, duke respektuar të gjitha kornizat ligjore”./teve1.info/
