Kryetari i Prishtinës, Përparim Rama bashkë me Drejtorin e Drejtorisë së Shërbimeve Publike, Bekim Brestovci, Drejtorin e Inspektoratit të Prishtinës, Florian Dushi, si dhe përfaqësuesin nga Kompania Regjionale “Pastrimi” Sh.A, Riza Selimi sot kanë mbajtur takim me përfaqësuesit e supermarketeve në Prishtinë.
Sipas faqes zyrtare të komunës së Prishtinës në Facebook, bëhet e ditur se qëllimi i këtij takimi ishte që të diskutohet mbi rregulloren e re për menaxhimin e mbeturinave.
Sipas njoftimit, kjo rregullore e re përfshin masa të rëndësishme, siç është rritja e përgjegjësisë së bizneseve.
“Përmes bashkëpunimit dhe diskutimeve konstruktive, palët shprehën përkushtimin e tyre për të implementuar praktika të qëndrueshme dhe efikase që do të ndihmojnë në ruajtjen e mjedisit dhe promovimin e një kulture përgjegjësie ndaj mbeturinave. Rregullorja e re përfshin masa të rëndësishme siç është rritja e përgjegjësisë së bizneseve për menaxhimin e mbeturinave që prodhojnë dhe reduktimin e ndotjes”, thuhet në njoftim.
Në njoftim bëhet e ditur se përveç këtij takimi, do të ketë edhe takime të tjera me qytetarët e institucione private për t`u njoftuar me veprimet që do merren nga komuna.
“Vec këtij takimi, do të mbahen edhe takime tjera me qytetarë e institucione private për t’u njoftuar me veprimet që do të ndërmerren nga Kryeqyteti për zbatimin e Rregullores për Menaxhimin e Mbeturinave. Ne besojmë se vetëm përmes përpjekjeve të përbashkëta mund të krijojmë një mjedis më të pastër dhe më të shëndetshëm për të gjithë”, thuhet në njoftim./teve1.info/
