Kryetari i PDK-së, Memli Krasniqi në tre-vjetorin të fitores së Lëvizjes Vetëvendosje në pushtet, ka thënë se Kurtit i kanë mjaftuar tri vite që premtimet t`i kthejë në mashtrim dhe shpresat në zhgënjim.
Përmes një njoftimi në Facebook, Krasniqi ka shkruar se Qeveria deri më tani i ka sjellë Kosovës stagnim në ekonomi, kolaps në shëndetësi, degradim në arsim,dështim në infrastrukturë, skandale në politikë të jashtme, izolim ndërkombëtar dhe sanksione për Kosovën.
“Për ta, e rëndësishme është që kulti i liderit të jetojë, qoftë edhe përmes një statuje qesharake prej bronzi – mbi varfërinë e qytetarëve dhe të ardhmen e cenuar të shtetit tonë. Përbuzja – është e vetmja trashëgimi politike të cilën ky pushtet po e lë mbrapa, tashmë, në kilometrat e fundit të tij!”, ka shkruar Krasniqi.
Ai ka akuzuar Kurtin se për këto tri vite ka prishur raportet me aleatët e sidomos me ShBA-në, duke thënë se kundërshtimi i saj është bërë politikë zyrtare qeveritare.
“Tri vite përplot me veprime të papërgjegjshme, përmes së cilave është rrezikuar vazhdimisht e ardhmja euro-atlantike e shtetit tonë. Tri vite kundër secilit aleat të Kosovës, posaçërisht SHBA-së, tashmë edhe si politikë zyrtare qeveritare”, ka shkruar Krasniqi./teve1.info/
