Sekretari amerikan i Shtetit, Antony Blinken tha se Shtetet e Bashkuara të Amerikës dhe partnerët e saj do të mbajnë përgjegjës të gjithë ata që kërcënojnë stabilitetin, përparimin dhe integrimin evropian të Ballkanit.
“Sot, Departamenti i Shtetit dhe Departamenti i Thesarit ndërmorën veprime për të shënjestruar aktorë në Ballkanin Perëndimor për aktivitete destabilizuese dhe korruptive. SHBA dhe partnerët si Britania e Madhe po mbajnë përgjegjës ata që kërcënojnë stabilitetin, përparimin dhe integrimin evropian të rajonit”, thotë Blinken në një postim në Twitter.
Ky reagim vjen pas vendimit të Departamentit të Thesarit të SHBA-së për të sanksionuar 7 individë nga vende të Ballkanit Perëndimor.
Ndërkohë, sot qeveria e Britanisë së Madhe sanksionoi dy politikanë pasi kanë minuar legjitimitetin e Bosnje-Hercegovinës. “Milorad Dodik dhe Zeljka Cvijanovic nuk lejohet të udhëtojnë në Mbretërinë e Bashkuar si dhe të përdorin ose të kenë akses në asnjë pasuri që mund të kenë në territorin britanik”, thuhet në njoftimin e shpërndarë nga Ambasada e Britanisë në Twitter.
